AXIOS: ამერიკელი ოფიციალური პირების განცხადებით, ტრამპი მზადაა შეამსუბუქოს ირანის წინააღმდეგ დაწესებული სანქციები და განბლოკოს თეირანის გაყინული ფინანსური აქტივები, თუ ირანული მხარე ბირთვულ პროგრამასთან დაკავშირებით კონკრეტულ ნაბიჯებს გადადგამს

ამერიკელი ოფიციალური პირების განცხადებით, აშშ-ის პრეზიდენტი, დონალდ ტრამპი მზადაა შეამსუბუქოს ირანის წინააღმდეგ დაწესებული სანქციები და განბლოკოს თეირანის გაყინული ფინანსური აქტივები, თუ ირანული მხარე ბირთვულ პროგრამასთან დაკავშირებით კონკრეტულ ნაბიჯებს გადადგამს, - წერს გამოცემა AXIOS-ი.

ეს გზავნილი იმ ფონზე ვრცელდება, როდესაც კატარელი და პაკისტანელი შუამავლები ცდილობენ დაპირისპირებულ მხარეებს შორის შეთანხმების მიღწევას.

ამ ეტაპზე ვაშინგტონსა და თეირანს შორის საკვანძო საკითხებზე სერიოზული აზრთა სხვადასხვაობა რჩება. ირანს სურს, რომ მოლაპარაკებები ჰორმუზის სრუტესა და აშშ-ის საზღვაო ბლოკადაზე იყოს ფოკუსირებული. ტრამპის ადმინისტრაცია კი მოითხოვს, რომ ირანი პირველ რიგში ბირთვულ დათმობებს დათანხმდეს. მიუხედავად ამისა, ვაშინგტონის შეთავაზება დიპლომატიური გარღვევის მცირე იმედს აჩენს მას შემდეგ, რაც ტრამპმა ირანის ბოლო წინადადება უარყო.

შუამავლები ნიუ-იორკში ირანის საგარეო საქმეთა მინისტრ აბას არაღჩის შეხვდნენ, რათა განეხილათ კატარის წინადადება, რომელზეც მხარეები ბოლო დღეების განმავლობაში მსჯელობენ. მოსალოდნელია, რომ კატარელი შუამავლები ტრამპის ადმინისტრაციის წარმომადგენლებსაც შეხვდებიან შეთანხმების მიღწევის მიზნით.

არაპირდაპირი მოლაპარაკებების მიმდინარეობის შესახებ ინფორმირებულმა ამერიკელმა ოფიციალურმა პირმა შეხვედრებს „პოზიტიური და კონსტრუქციული“ უწოდა და აღნიშნა, რომ ირანმა ბირთვულ საკითხებზე მოქნილობა გამოავლინა. თუმცა მან ხაზი გაუსვა, რომ მხარეებს შორის პოზიციური აცდენა კვლავ რჩება და შეთანხმება ვერ შედგება, სანამ ბირთვული საკითხები არ მოგვარდება. მისივე თქმით, მხარეები ჯერ კიდევ ვერ თანხმდებიან ვალდებულებების შესრულების ვადებსა და იმაზე, თუ ვინ უნდა გადადგას პირველი ნაბიჯი.

„ჰორმუზის სრუტეში ნაოსნობა იზრდება, ხოლო ბლოკადა და სანქციები ირანის პოზიციებს სულ უფრო ასუსტებს. აშშ-ის პოზიცია ყოველდღიურად მყარდება, პრეზიდენტი ტრამპი ინარჩუნებს მოთმინებას და ერთგული რჩება მიზნისა, რომ ირანმა არასდროს მოიპოვოს ბირთვული იარაღი“, - განაცხადა ოფიციალურმა პირმა.

მან ასევე დასძინა, რომ თეთრი სახლი სკეპტიკურადაა განწყობილი ირანის დაპირებების მიმართ და თეირანი გასული ივლისის ურთიერთგაგების მემორანდუმის დარღვევაში დაადანაშაულა, როდესაც ირანულმა მხარემ ჰორმუზის სრუტეში კომერციულ გემებს ცეცხლი გაუხსნა. მისი თქმით, ამჯერად აშშ-ს სჭირდება გარანტიები, რომ ირანი სერიოზულადაა განწყობილი და არ ცდილობს უბრალოდ თავი დააღწიოს შექმნილ მძიმე ვითარებას.