AXIOS: ნეთანიაჰუმ ნატოს სამიტის წინ ტრამპს ერდოღანის შეკავება სთხოვა
ისრაელის პრემიერ-მინისტრმა, ბენიამინ ნეთანიაჰუმ პარასკევს პრეზიდენტ ტრამპთან საუბარში უკმაყოფილება გამოთქვა თურქეთის პრეზიდენტის, რეჯეფ თაიფ ერდოღანის მხრიდან ისრაელის საწინააღმდეგო რიტორიკის გამწვავების გამო. ინფორმაციას ამის შესახებ გამოცემა AXIOS-ი ისრაელურ და ამერიკულ წყაროებზე დაყრდნობით ავრცელებს.
ნეთანიაჰუმ ასევე სთხოვა პრეზიდენტ ტრამპს - რომელიც მიმდინარე კვირაში, ანკარაში დაგეგმილი ნატოს სამიტის ფარგლებში ერდოღანს შეხვდება - თავი შეიკავოს ისეთი შეიარაღების მიყიდვისგან, რაც თურქეთს საკუთარი საჰაერო ძალების მოდერნიზაციაში დაეხმარება.
ისრაელსა და თურქეთს შორის ურთიერთობა უკანასკნელი ორი წლის განმავლობაში, ღაზასა და ირანში მიმდინარე ომების ფონზე, უკიდურესად დაიძაბა. თუმცა, ტრამპი ინარჩუნებს მჭიდრო და მეგობრულ კავშირებს როგორც ნეთანიაჰუსთან, ისე ერდოღანთან.
წყაროების ცნობით, პარასკევს გამართულ სატელეფონო საუბარში ნეთანიაჰუმ ტრამპთან ერდოღანის ქმედებები გააპროტესტა და მიანიშნა, რომ აშშ-ის პრეზიდენტისგან თურქი ლიდერის შეკავებას ელის.
„ნეთანიაჰუმ კონკრეტული თხოვნა გააჟღერა და პრეზიდენტმა ის მოისმინა. ამიტომ, შესაძლოა, პრეზიდენტმა [ერდოღანს] გადასცეს გზავნილი დაახლოებით ამ შინაარსით: „ეი, შეგიძლია ცოტა შეარბილო ეს ყველაფერი?“ თუმცა, საქმე ისაა, რაც არის“, - განაცხადა აშშ-ის ოფიციალურმა პირმა.
იმედი
წყარო: imedinews.ge