ბიძინა გიორგობიანი: კარგია, რომ საქართველოს ხელისუფლების მიერ კონტროლირებად ტერიტორიაზე არ არის სხვა ქვეყნის ჯარი, რომელსაც გამოიყენებს ჩვენი გამყიდველი ოპოზიცია, რომ აქ მოაწყოს ისეთივე სისხლიანი სცენარი, როგორიც ეს ვნახეთ 91-92 წლის სახელმწიფო გადატრიალებისას

კარგია, რომ საქართველოს ხელისუფლების მიერ კონტროლირებად ტერიტორიაზე არ არის სხვა ქვეყნის რომელიმე ჯარი, რომელსაც გამოიყენებს ჩვენი შიდა გამყიდველი ოპოზიცია, რომ აქ მოაწყოს ისეთივე სისხლიანი სცენარი, როგორიც ეს ვნახეთ 91-92 წლის სახელმწიფო გადატრიალების მსვლელობისას, - განაცხადა „ერთიანი ნეიტრალური საქართველოს" პოლიტიკურმა მდივანმა ბიძინა გიორგობიანმა გადაცემაში „დღის ქრონიკა".

მისივე თქმით, საქართველო დემოკრატიული ქვეყანაა და დემონსტრაციები და გამოსვლები პრობლემა არაა.

„დიდი ხანია აანონსებენ ისინი, რამდენიმე წელია უკვე შევეჩვიეთ ამას. ეს გამოსვლები, დემონსტრაციები რამე პრობლემას არ წარმოადგენს. საქართველოში დემოკრატიაა და ყველას შეუძლია ამის გაკეთება. მთავარია ეს არ გადაიზარდოს სახელმწიფო გადატრიალების მცდელობაში, რომელსაც რამდენჯერმე უკვე ჰქონდა ადგილი. კარგია, რომ სახელმწიფოს უკვე შეუძლია აღკვეთოს ეს. კარგია, რომ საქართველოს ხელისუფლების მიერ კონტროლირებად ტერიტორიაზე არ არის სხვა ქვეყნის რომელიმე ჯარი, რომელსაც გამოიყენებს ჩვენი შიდა გამყიდველი ოპოზიცია, რომ აქ მოაწყოს ისეთივე სისხლიანი სცენარი, როგორიც ეს ვნახეთ 91-92 წლის სახელმწიფო გადატრიალების მსვლელობისას“, - აღნიშნა ბიძინა გიორგობიანმა.

მან ასევე ისაუბრა გიორგი კანდელაკის „კვლევაზე“, სადაც წერია, რომ თბილისი ირანის მიერ აგენტების გადაბირებისა და ტერორისტული ოპერაციების ნაყოფიერ ნიადაგად იქცა.

„ეს იყო საქართველოს წინააღმდეგ მიმართული დეზინფორმაცია, რომლითაც საქართველოს მტერი პოლიტიკური ძალები, რომლებიც მოკალათებული არიან ბრიუსელში და სურთ, რომ საქართველოში ცხელი წერტილი შექმნან, რომ რამენაირად თავიანთი, ბალტიისპირეთისა და ჩრდილოეთ ევროპის ქვეყნებს აარიდონ ის, რისი რეალური საშიშროების წინაშეც დგანან. მათ მიერ დაფინანსებული და დაკვეთილი მგონია ეს დეზინფორმაცია. მათი დაფინანსებითაა შეკვეთილი, დაწერილი და მათი ინტერესების გათვალისწინებით გააჟღერა ეს გიორგი კანდელაკმა, ალბათ, სავარაუდოდ, გარკვეული ანაზღაურების შესაბამისად. მათთვის არ არის ეს პირველი, სამწუხაროდ, არც უკანასკნელი. ასეთი შეტევები კიდევ იქნება საქართველოს წინააღმდეგ. ჩვენ გარკვეული იმუნიტეტიც გამოვიმუშავეთ და შეგვიძლია, რომ ის პოლიტიკური ძალები, რომლებიც საქართველოს წინააღმდეგ ახორციელებენ ანტიკონსტიტუციურ და კანონსაწინააღმდეგო ქმედებებს, უნდა იყვნენ აკრძალული კანონით და მათ არ უნდა ჰქონდეთ პოლიტიკური მოქმედების უფლება. ეს არ არის ოპოზიცია ეს არის უცხო ქვეყნების აგენტურა, რომელიც მოქმედებს ოპოზიციის სახელით“, - აღნიშნა გიორგობიანმა.