ბიძინა გიორგობიანი: მთელი პოლიტიკური კლასი არ უნდა ვიყოთ გადართული მხოლოდ ევროკავშირთან ურთიერთობის გაჯანსაღებაზე. ჩვენ უნდა ვიყოთ გადართული იმაზე, როგორ ავაწყოთ სავაჭრო ურთიერთობები უფრო მეტად ჩინეთთან, ცენტრალური და შუა აზიის ქვეყნებთან, მეზობლებთან, - თურქეთთან, ირანთან, სომხეთთან, აზერბაიჯანთან, რუსეთთან

„ხელისუფლებამ უნდა გააკეთოს ის, რომ მთელი პოლიტიკური კლასი არ უნდა ვიყოთ გადართული მხოლოდ ევროკავშირთან ურთიერთობის გაჯანსაღებაზე. ჩვენ უნდა ვიყოთ გადართული იმაზე, როგორ ავაწყოთ სავაჭრო ურთიერთობები უფრო მეტად ჩინეთთან, უფრო მეტად ცენტრალური და შუა აზიის ქვეყნებთან, უფრო მეტად ჩვენს მეზობლებთან, თურქეთთან, ირანთან, სომხეთთან, აზერბაიჯანთან, რუსეთთან“, - განაცხადა გადაცემაში „იმედი LIVE“ „ერთიანი ნეიტრალური საქართველოს“ პოლიტიკურმა მდივანმა ბიძინა გიორგობიანმა.

მისი თქმით, ჩვენი დამოკიდებულება არ უნდა იყოს ის, რომ რამენაირად გვცანით ჩვენ და მიგვიღეთ ევროკავშირში.

„ერთ-ერთი მათ შორის იყო სავაჭრო ურთიერთობები ევროკავშირთან, რომელთანაც ჩვენ გვაქვს თავისუფალი ვაჭრობა, გვაქვს ასოცირების ხელშეკრულება და თავისუფალი ვაჭრობა. ის თავისუფალი ვაჭრობა ევროკავშირს უფრო აწყობს ვიდრე ჩვენ იმიტომ, რომ სავაჭრო სალდო ძალიან უარყოფითი გვაქვს ევროკავშირთან. ისინი არ მოისურვებენ ამ თავისუფალი ვაჭრობის გაუქმებას, ვინაიდან ისინი ხეირობენ ამით.

ანუ, ჩვენი დამოკიდებულება არ უნდა იყოს ის, რომ რამენაირად გვცანით ჩვენ და მიგვიღეთ ევროკავშირში. ჩვენ რომ ვიყოთ ევროკავშირის წევრი, ჩვენთან შეიცვლება ძალიან ბევრი რამ და შეიცვლება უარყოფითისკენ. ისეთ ადგილად ვცხოვრობთ და ისეთი მეზობლების გარემოცვაში ვართ, რომ ევროკავშირის წევრობა დღეს საქართველოს ეკონომიკისთვის კოლაფსის მომტანი იქნება“, - აღნიშნა გიორგობიანმა.