ბიძინა გიორგობიანი: ცენტრალური აზიის ქვეყნებთან სტრატეგიული პარტნიორობის გაღრმავება არის ძალიან სწორი ნაბიჯი და მიმართულება, ვინაიდან ჩვენ ცენტრალურ აზიასთან ისტორიული ეკონომიკური კავშირი გვაქვს
შეხედულება, რომ მხოლოდ ევროპასა და ბრიუსელშია ჭეშმარიტების ქვა და არ შეიძლება აზიაში ან მეზობლებთან გქონდეს ურთიერთობა, არის მცდარი პოლიტიკა, რომელსაც აწარმოებდა წინა ხელისუფლება და რომელიც იყო საქართველოს ეკონომიკისა და პოლიტიკური განვითარების წინაშე ძალიან დიდი დანაშაული, - განაცხადა „დღის ქრონიკაში“ „ერთიანი ნეიტრალური საქართველოს“ პოლიტიკურმა მდივანმა ბიძინა გიორგობიანმა.
მისი თქმით, ცენტრალურ აზიის ქვეყნებთან სტრატეგიული პარტნიორობის გაღრმავება არის ძალიან სწორი ნაბიჯი და მიმართულება, ვინაიდან საქართველოს ცენტრალურ აზიასთან ისტორიული ეკონომიკური კავშირი აქვს.
„ჩვენი პარტია „ერთიანი ნეიტრალური საქართველო“ უკვე დიდი ხანია აცხადებს, რომ ჩვენი ეკონომიკური ბაზრები არის ძირითადად ცენტრალურ აზიაში, აღმოსავლეთში და უშუალოდ მეზობლებთან. მხოლოდ ამ კონტექსტში შეიძლება განვიხილოთ სავაჭრო ურთიერთობები სხვა ეკონომიკურ და პოლიტიკურ ბლოკებთან, მათ შორის ევროკავშირთანაც. ცენტრალური აზიის ქვეყნებთან სტრატეგიული პარტნიორობის გაღრმავება არის ძალიან სწორი ნაბიჯი და მიმართულება, ვინაიდან ჩვენ ცენტრალურ აზიასთან ისტორიული ეკონომიკური კავშირი გვაქვს.
ეს რაღაც ჩამოყალიბებული შეხედულება, რომ მხოლოდ ევროპაში უნდა იარონ და მხოლოდ ბრიუსელშია ჭეშმარიტების ქვა, რომელსაც ხელს მოჰკიდებენ და უკვე კარგები ხდებიან და არ შეიძლება აზიაში ან მეზობლებთან გქონდეს ურთიერთობა, არის მცდარი პოლიტიკა, რომელსაც აწარმოებდა წინა ხელისუფლება. ეს იყო საქართველოს ეკონომიკისა და პოლიტიკური განვითარების წინაშე ძალიან დიდი დანაშაული", - აღნიშნა გიორგობიანმა.
მან „შუა დერეფნის“ მნიშვნელობაზეც ისაუბრა.
„შუა დერეფანი“ წარმოადგენს მულტიმოდალურ პოლიტიკურ და ეკონომიკურ პროექტს, რომელშიც ძირითადი მაგისტრალური ხაზის მონაწილეა 7 ქვეყანა, მაგრამ ეს ეხება მთლიანად რეგიონს, აზიას. ეს მულტიმოდალური პროექტი, რომელიც საქართველოზე გადის, შეიცავს, როგორც ბაქო-თბილისი-ყარსის რკინიგზის, ასევე, აღმოსავლეთ-დასავლეთ ავტომაგისტრალის მშენებლობას, ასევე პორტების მოდერნიზებას. ეს არის საქართველოს მომავალი, სწორი ორიენტაცია და სწორი გათვლები სამომავლოდ, რამაც საქართველოს უნდა მოუტანოს ძალიან დიდი შემოსავლები და ხანგრძლივი სტაბილური განვითარების პერსპექტივა", - განაცხადა ბიძინა გიორგობიანმა.
