ბლოკი „ძლიერი სომხეთი“: არჩევნები უპრეცედენტო ზეწოლის, დევნისა და დარღვევების ფონზე ჩატარდა

სომხეთში გამართულ საპარლამენტო არჩევნებთან დაკავშირებით, ბლოკ „ძლიერი სომხეთის“ პრესსპიკერმა, მარიანა ღაჰრამანიანმა განცხადება გაავრცელა. ოპოზიციური ბლოკის წარმომადგენლის განცხადებით, მთელი საარჩევნო პროცესის განმავლობაში მათი გუნდი ხელისუფლების მხრიდან ორგანიზებული, უპრეცედენტო და მასშტაბური დევნისა და ზეწოლის პირობებში მუშაობდა.

ღაჰრამანიანის თქმით, წინასაარჩევნო პერიოდი მიზანმიმართული რეპრესიებით ხასიათდებოდა, რაც მიზნად ისახავდა პოლიტიკური კონკურენციის შეზღუდვასა და ამომრჩევლის ნებაზე გავლენის მოხდენას.

„წინასაარჩევნო ფაზას თან სდევდა მიზანმიმართული ქმედებები ჩვენი ლიდერის [ბლოკის პრემიერ-მინისტრობის კანდიდატი, ბიზნესმენი და ქველმოქმედი სამველ კარაპეტიანი], დეპუტატობის კანდიდატების, მხარდამჭერებისა და გუნდის წევრების წინააღმდეგ. ადგილი ჰქონდა მასობრივ უკანონო დაკავებებსა და სისხლისსამართლებრივ დევნას“, - აცხადებს პრესსპიკერი.

„ძლიერ სომხეთში“ აღნიშნავენ, რომ უშუალოდ კენჭისყრის დღეს ადმინისტრაციული რესურსი მასშტაბურად იყო გამოყენებული, როგორც სახელმწიფო, ისე მუნიციპალურ დონეზე, რათა არჩევნების საბოლოო შედეგები წინასწარ ყოფილიყო განსაზღვრული. ოპოზიციის მტკიცებით, რესპუბლიკის მასშტაბით მთელი დღის განმავლობაში უამრავი საარჩევნო დარღვევა დაფიქსირდა.

ბლოკის განცხადებაში განსაკუთრებული ყურადღება გამახვილდა ქვეყნის პრემიერ-მინისტრის, ნიკოლ ფაშინიანის ქმედებაზე.

„მოხდა უპრეცედენტო ფენომენი: სანამ ცენტრალური საარჩევნო კომისია ყველა საარჩევნო უბნის შედეგებს დაამუშავებდა, ნიკოლ ფაშინიანმა ‘გამარჯვება და მთავრობის ერთპიროვნულად ფორმირება’ გამოაცხადა. ეს იყო პირდაპირი მითითება და სიგნალი ცესკოსთვის“, - ნათქვამია განცხადებაში.

მარიანა ღაჰრამანიანი ხაზგასმით აღნიშნავს, რომ ამ პირობებში გამოქვეყნებული ციფრები ვერ ასახავს ამომრჩევლის ნამდვილ ნებას და მათი მიღება სიღრმისეული შესწავლის, სამართლებრივი და პოლიტიკური შეფასების გარეშე შეუძლებელია.

ამ დროისთვის, „ძლიერი სომხეთის“ ცენტრალური შტაბი საარჩევნო უბნებიდან მიღებულ მონაცემებსა და შექმნილ ვითარებას აანალიზებს. ბლოკის ოფიციალური პოზიცია და შემდგომი პოლიტიკური ნაბიჯები საზოგადოებისთვის სწორედ ამ ანალიზის დასრულების შემდეგ გახდება ცნობილი.