ბრაზილიაში ქართული კულტურის დღეების ფარგლებში, რიო-დე-ჟანეიროს კლარო მაიზის თეატრში, ანსამბლ „რუსთავის“ კონცერტი გაიმართა

ბრაზილიაში ქართული კულტურის დღეების ფარგლებში, რიო-დე-ჟანეიროს კლარო მაიზის თეატრში, ანსამბლ „რუსთავის“ კონცერტი გაიმართა.

ღონისძიებას საქართველოს კულტურის მინისტრის მოადგილე გიორგი მირცხულავა დაესწრო.

დამსწრე საზოგადოებას სიტყვით მიმართა ბრაზილიაში საქართველოს საგანგებო და სრულუფლებიანმა ელჩმა, ზურაბ მჭედლიშვილმა. მუნიციპალური საკრებულოს პრეზიდენტმა საქართველოს ელჩს რიო-დე-ჟანეიროს საპატიო მოქალაქის წოდება გადასცა.

ასევე, საქართველოს დამოუკიდებლობის დღისადმი მიძღვნილი ოფიციალური მიღება გაიმართა, რომელსაც ბრაზილიის სახელმწიფო უწყებების, დიპლომატიური კორპუსისა და კულტურის სფეროს წარმომადგენლები დაესწრნენ.

ქართული კულტურის დღეები ბრაზილიაში საქართველოს კულტურის სამინისტროს მხარდაჭერით და საქართველოს საგარეო საქმეთა სამინისტროს თანადგომით ჩატარდა. ბრაზილიაში საქართველოს საელჩო პროექტის თანაორგანიზატორია.

ღონისძიებები საქართველოს პოპულარიზაციას და ორ ქვეყანას შორის თანამშრომლობის გაღრმავებას ისახავს მიზნად.

ინფორმაციას კულტურის სამინისტრო ავრცელებს.