BTS-მა ​Grammy-ზე მონაწილეობაზე უარი თქვა, მას შემდეგ, რაც პრემიის ორგანიზატორებმა აზიური პოპ-მუსიკის კატეგორია დაამატეს

კეი-პოპ ჯგუფი BTS თავის ალბომს Arirang-ს 2027 წლის მუსიკალურ პრემია Grammy-ზე არ წარადგენს. თავისი გადაწყვეტილების შესახებ ჯგუფის წევრებმა Instagram-ზე გამოქვეყნებულ პოსტებში ისაუბრეს.

„ჩვენ ვიმედოვნებთ, რომ ჩვენს მუსიკას მოუსმენენ და შეიყვარებენ ისეთს, როგორიც არის - რეგიონებად ან ენებად დაყოფის გარეშე“, - აღნიშნულია მუსიკოსების განცხადებაში.

თვენახევრის წინ ამერიკის ხმისჩამწერმა აკადემიამ, რომელიც Grammy-ს ატარებს, რამდენიმე ახალი კატეგორიის დამატების შესახებ გამოაცხადა, მათ შორის არის „აზიური პოპ-მუსიკის საუკეთესო შესრულება“. კატეგორია პრემიის ინკლუზიურობის გასაზრდელად შემოიღეს, თუმცა კეი-პოპის ზოგიერთმა ფანმა ეს ნაბიჯი გააკრიტიკა და მიიჩნია, რომ ეს კეი-პოპ შემსრულებლებს მთავარ კატეგორიებში გამარჯვებაში შეუშლის ხელს.

BTS-ი Grammy-ზე ხუთჯერ იყო ნომინირებული, თუმცა პრემია არასდროს მოუგია.

BTS-მა ალბომი Arirang 2026 წლის მარტში გამოუშვა - ოთხწლიანი პაუზის შემდეგ, რაც კოლექტივის წევრების მიერ სავალდებულო სამხედრო სამსახურის გავლით იყო გამოწვეული. Arirang-ი სამი კვირის განმავლობაში ინარჩუნებდა პირველ ადგილს ამერიკულ ჩარტ Billboard-ში, რაც კეი-პოპ ალბომებისთვის რეკორდული მაჩვენებელი გახდა.

„გრემის“ წესების მიხედვით, კატეგორიაში „აზიური პოპ-მუსიკის საუკეთესო შესრულება“ გამარჯვებაზე პრეტენზია შეუძლია განაცხადოს ნამუშევრებს „აზიის ქვეყნების ერთი ან რამდენიმე ენის მნიშვნელოვანი გამოყენებით“. როგორც ჟურნალისტებმა დაითვალეს, ალბომ Arirang-ის სიმღერების 80% ინგლისურ ენაზეა დაწერილი.