ბუქარესტში, რუმინეთის საპატრიარქოს სასახლის სადღესასწაულო დარბაზში საქართველოს დამოუკიდებლობის დღისადმი მიძღვნილი საზეიმო მიღება გაიმართა
ბუქარესტში, რუმინეთის საპატრიარქოს სასახლის სადღესასწაულო დარბაზში საქართველოს დამოუკიდებლობის დღისადმი მიძღვნილი საზეიმო მიღება გაიმართა. ღონისძიებას დაესწრო რუმინეთის საპატრიარქოს, დიპლომატიური კორპუსის, პოლიტიკური და კულტურული წრეების, აგრეთვე რუმინეთში მცხოვრები ქართული დიასპორის წარმომადგენლები.
საზეიმო ნაწილის ფარგლებში, რუმინეთში საქართველოს საგანგებო და სრულუფლებიან ელჩს, თამარ ბერუჩაშვილს, რუმინეთის პატრიარქის, მისი უწმინდესობა დანიელის სახელით, ეპისკოპოსმა ვარლამმა რუმინეთის მართლმადიდებელი ეკლესიის მაღალი ჯილდო - „წმინდა მარიამ ბრანკოვიანუს ჯვრის“ ორდენი გადასცა.
ჯილდო ელჩს გადაეცა რუმინეთ-საქართველოს შორის სულიერი, კულტურული და ჰუმანიტარული კავშირების განმტკიცებაში, ქართული კულტურის პოპულარიზაციასა და ორი ქვეყნის მართლმადიდებელ ეკლესიებს შორის თანამშრომლობის გაღრმავებაში შეტანილი მნიშვნელოვანი წვლილისთვის.
ეპისკოპოსმა ვარლამმა ხაზი გაუსვა თამარ ბერუჩაშვილის აქტიურ ძალისხმევას რუმინეთისა და საქართველოს მოძმე ეკლესიებს შორის კავშირის გაღრმავების ხელშეწყობისა და ანთიმოზ ივერიელის, როგორც ორ ერსა და ეკლესიას შორის ისტორიულ-კულტურული ხიდის პოპულარიზაციის მიმართულებით.
დაჯილდოების ცერემონიაზე ასევე ხაზგასმით აღინიშნა, რომ თამარ ბერუჩაშვილის დიპლომატიურმა საქმიანობამ მნიშვნელოვნად შეუწყო ხელი ქართულ-რუმინული მეგობრობისა და სტრატეგიული პარტნიორობის გაძლიერებას, განსაკუთრებით კულტურის, განათლებისა და სულიერი ცხოვრების სფეროებში.
თამარ ბერუჩაშვილმა მადლობა გადაუხადა რუმინეთის მართლმადიდებელ ეკლესიას მაღალი შეფასებისთვის და აღნიშნა, რომ ეს ჯილდო არის არა მხოლოდ მისი და საქართველოს საელჩოს საქმიანობის აღიარება, არამედ საქართველოსა და რუმინეთის ხალხებს შორის ისტორიული კავშირებისა და მეგობრობის დასტური.
„ეს მაღალი ჯილდო არა მხოლოდ პირადი აღიარებაა, არამედ უპირველეს ყოვლისა, იმ მდგრადი სულიერი და კულტურული კავშირების დასტურია, რომლებიც ქართველ და რუმინელ ხალხებს აერთიანებს“, - აღნიშნა მან.
