ჩინეთში „უფროსი დის“ სერვისით სულ უფრო მეტი ადამიანი სარგებლობს

ჩინეთში სულ უფრო პოპულარული ხდება სერვისი „უფროსი დების კომისია“, რომლის არსიც იმაში მდგომარეობს, რომ ზრდასრული ქალები, ფულის სანაცვლოდ, ახალგაზრდა გოგონებს რჩევებს აძლევენ და მხარს უჭერენ.

გამოცემა South China Morning Post-ის ცნობით, 30-დან 40 წლამდე ასაკის ქალები „უმცროს დებს“ სთავაზობენ მოსმენას, საკუთარ მდიდარ ცხოვრებისეულ გამოცდილებაზე დაყრდნობით რჩევების მიცემას ან უბრალოდ ესაუბრებიან. ასეთი მომსახურების ფასები საშუალოდ 150-დან 300 იუანამდე მერყეობს (59-118 ლარი).

თუმცა, არიან ისეთებიც, ვინც ფულს არ ითხოვს და გოგონებს მხოლოდ საკვებისა და ერთობლივი აქტივობების ხარჯების დაფარვას სთხოვს.

27 წლის კიკი ერთ-ერთი პირველი იყო, ვინც ეს სერვისი მასებში გაავრცელა. ის საკუთარ თავს ახასიათებს, როგორც ექსტრავერტს, რომელიც ასრულებს მკაცრი უფროსი დის როლს - შეუძლია მოისმინოს და კრიტიკული უკუკავშირი მისცეს.

მას შემდეგ, რაც მან პოსტი სოციალურ ქსელში გამოაქვეყნა, ეს ინიციატივა სხვა ქალებმაც აიტაცეს და საკუთარი სერვისების შეთავაზება დაიწყეს. ხშირად ისინი „რაციონალური“ ან „ემოციური“ დის ვარიანტს სთავაზობენ მომხმარებელს, რათა გოგონებმა წინასწარ აირჩიონ, კონკრეტულად რისი მიღება სურთ ასეთი შეხვედრისგან - მხარდაჭერის თუ ობიექტური შეფასების.