CNN: ამერიკელთა 81% განიცდის ფინანსურ სირთულეებს საწვავის ფასების გამო და უმეტესობა ამაში ტრამპს ადანაშაულებს

ამერიკელთა აბსოლუტური უმრავლესობა აცხადებს, რომ ბენზინის ფასების ისტორიული ზრდის გამო ფინანსურ ზეწოლას განიცდის, - წერს ტელეკომპანია CNN-ი.

ოთხშაბათს გამოქვეყნებული NPR/PBS News/Marist-ის გამოკითხვის თანახმად, 10-დან 8-ზე მეტი ამერიკელი ამბობს, რომ საწვავის ფასები მათ საოჯახო ბიუჯეტზე მნიშვნელოვან (33%) ან მცირე (48%) გავლენას ახდენს.

გამოკითხულთა მხოლოდ 19%-მა აღნიშნა, რომ საწვავის ფასების გამო არანაირ ფინანსურ სირთულეს არ განიცდის.

ამერიკის ავტომობილების ასოციაციის (AAA) მონაცემებით, რეგულარული მარკის ბენზინის საშუალო ფასი ქვეყნის მასშტაბით ზედიზედ 15 დღის განმავლობაში იზრდებოდა და ხუთშაბათს გალონზე 4.56 დოლარს მიაღწია.

ეს მაჩვენებელი საგრძნობლადაა მომატებული იმ პერიოდთან შედარებით, ვიდრე ახლო აღმოსავლეთში ომი დაიწყებოდა, როდესაც გალონი ბენზინი 2.98 დოლარი ღირდა.