CNN: აშშ-ის ადმინისტრაციის მაღალჩინოსანმა დეტალურად განმარტა აშშ-სა და ირანს შორის მოსალოდნელი შეთანხმების რამდენიმე პუნქტი

აშშ-ის ადმინისტრაციის მაღალჩინოსანმა დეტალურად განმარტა აშშ-სა და ირანს შორის მოსალოდნელი შეთანხმების რამდენიმე პუნქტი და დოკუმენტი წარმოაჩინა, როგორც პრეზიდენტ დონალდ ტრამპის მიზნების მიღწევა, - წერს CNN-ი.

სამუშაო ჩარჩო მოიცავს შემდეგ პუნქტებს:

ჰორმუზის სრუტის ხელახალი გახსნა და ირანის პორტებზე აშშ-ის ბლოკადის მოხსნა. ირანის ბირთვული პროგრამის დემონტაჟი, მათ შორის შეერთებული შტატების მიერ ირანის გამდიდრებული მასალის მოპოვება, რომელიც, ოფიციალური პირის განცხადებით, ადგილზე განადგურდება და შემდგომ ქვეყნიდან იქნება გატანილი. ირანი „გათავისუფლდება იმ ეკონომიკური ზეწოლის დიდი ნაწილისგან, რომლის ქვეშაც მრავალი წლის განმავლობაში იმყოფებოდა“, თუ ქვეყანა შეასრულებს შეთანხმების პირობებს. „ეს სარგებელი მხოლოდ იმ შემთხვევაში იქნება მიღწეული, თუ ისინი რეალურად შეასრულებენ პირობებს.

ირანისთვის ფინანსური შეღავათების დაწესების საკითხი აშშ-სა და ირანს შორის მოლაპარაკებების მთავარ დაბრკოლებას წარმოადგენდა. ოფიციალური პირი აცხადებს, რომ მსგავსი შეღავათები მხოლოდ მას შემდეგ გახდება ხელმისაწვდომი, რაც ირანი გადადგამს ნაბიჯებს პირობების შესასრულებლად.

„ირანელები ვერაფერს მიიღებენ ურთიერთგაგების მემორანდუმის ხელმოწერისას ან უშუალოდ მოლაპარაკებების პროცესში“, - განაცხადა მაღალჩინოსანმა.

„ისინი მიიღებენ ეკონომიკურ ჯილდოს შეთანხმებით ნაკისრი ვალდებულებების შესრულებისთვის. ასე რომ, თუ ისინი დათმობენ ბირთვულ მასალას, როგორც დაგვპირდნენ, მიიღებენ რაღაცას. თუ ისინი მოახდენენ თავიანთი ბირთვული პროგრამების ან ბირთვული ობიექტების დემონტაჟს, მიიღებენ სხვა რამეს. ხოლო თუ ისინი ნამდვილად აიღებენ რეგიონული მშვიდობისა და სტაბილურობის ვალდებულებას, ამ ყველაფერთან ერთად დამატებით სარგებელსაც მიიღებენ“.