CNN: აშშ-ში ინფლაციამ, ნავთობის გაძვირების გამო, ბოლო სამი წლის განმავლობაში პირველად გადააჭარბა 4%-ს

აშშ-ის შრომის სტატისტიკის ბიუროს ახალი მონაცემების თანახმად, მაისში წლიურმა ინფლაციამ ბოლო სამი წლის მაქსიმუმს - 4.2%-ს მიაღწია, რაც ხაზს უსვამს იმას, თუ როგორ აისახება ენერგომატარებლებზე გაზრდილი ფასები აშშ-ის ეკონომიკაზე, - წერს ტელეკომპანია CNN-ი.

სამომხმარებლო ფასების ინდექსის (CPI) უახლესი მონაცემებით, ყოველთვიურ ჭრილში ფასები 0.5%-ით გაიზარდა, რისი მთავარი გამომწვევი მიზეზიც ირანთან ომია.

ყოველთვიური მატების 60% სწორედ ენერგომატარებლების გაძვირებაზე მოდის.

სურსათისა და პროდუქტების საერთო ფასები მაისში ისე სწრაფად არ გაზრდილა, როგორც აპრილში - მათმა მატებამ შესაბამისად 0.2% და 0.1% შეადგინა, მაშინ როცა აპრილში ეს მაჩვენებლები 0.5% და 0.7% იყო.

FactSet-ის პროგნოზების თანახმად, ეკონომისტები ელოდნენ ფასების 0.5%-იან ზრდას წინა თვესთან შედარებით, ხოლო წლიური ტემპის დაჩქარებას - 4.2%-მდე, აპრილში დაფიქსირებული 3.8%-დან.