დაბა ხულოში ცენტრალური სკვერი მოეწყო

დაბა ხულოში თანამედროვე სტანდარტების შესაბამისი ცენტრალური სკვერი მოეწყო, რომელიც ადგილობრივებისა და მუნიციპალიტეტის სტუმრებისთვის ერთ-ერთი მთავარი დასასვენებელი და თავშეყრის სივრცე იქნება.

პროექტის ფარგლებში რეაბილიტაცია 3900 კვადრატულ მეტრზე მეტ ფართობზე განხორციელდა და მრავალფუნქციური საზოგადოებრივი სივრცე შეიქმნა. სკვერში მოეწყო ბავშვთა გასართობი და სპორტული ზონები, მოსასვენებელი სივრცეები, საფეხმავლო ბილიკები და გარე განათების სისტემა.

ინფრასტრუქტურული პროექტის ფარგლებში აღიმართა საქართველოს ეროვნული დროშა და დაიდგა ქართველი პროზაიკოსის, ჰიმნოგრაფის, მწიგნობრისა და ასტრონომის, ტბელ აბუსერიძის ძეგლი. ასევე განხორციელდა გამწვანების სამუშაოები - ტერიტორიაზე სხვადასხვა სახეობის ხე-მცენარეები დაირგო.

ცენტრალური სკვერის მოწყობისთვის ადგილობრივი თვითმმართველობის ბიუჯეტიდან 1 167 988 ლარი გამოიყო.