დაპირისპირების მორიგი სერია ოპოზიციურ ფლანგზე - ურთიერთბრალდებები ყოფილ მოკავშირეებს შორის ღიად ისმის. „ქრონიკის“ სიუჟეტი

დაპირისპირების მორიგი სერია ოპოზიციურ ფლანგზე - ურთიერთბრალდებები ყოფილ მოკავშირეებს შორის ღიად ისმის. მოქმედი და ყოფილი ნაციონალები ერთმანეთს სიცრუეში და პოლიტიკურ მანიპულაციებში ადანაშაულებენ.

მმართველ გუნდში მიაჩნიათ, რომ ოპოზიციამ რესურსი სრულად ამოწურა და საკუთარი უუნარობის მიზეზებს ერთმანეთში ეძებენ.

„ახალის“ ლიდერი ნიკა გვარამია სააკაშვილსა და მის პარტიას სიცრუის გავრცელებაში ადანაშაულებს.

„განსაკუთრებით სამწუხარო ისაა, რომ ამ კამპანიაში ძალიან აქტიურად ჩაერთო თავად სააკაშვილიც, რომელმაც შესანიშნავად იცის გილაურის ამბავიც და ისიც, რომ 40 მილიონის ისტორია შეთხზული ტყუილი და წარმოუდგენელი აბსურდია. გილაურთან მისივე ინიციატივით და სააკაშვილის პარტიის წევრის და იმ დროისთვის მისთვის ყველაზე მეტად სანდო ფიგურის შუამავლობით აღმოვჩნდი“, - წერს გვარამია.

მას ანი წითლიძე პასუხობს: „დაასახელე ეს ადამიანი. ვინ არის ის, ვინც გილაურთან მიგიყვანა? თუ არ იტყუები, ამის თქმის გაბედაობაც უნდა გეყოს. მე ვიცი, ვის გულისხმობ. და ისიც ვიცი, რატომ შეიძლება, ძალიან ცუდ ბუმერანგად დაგიბრუნდეს ამ ადამიანის დასახელება - ბევრი ისეთი რამ შეიძლება, გახდეს საჯარო, რაზეც ახლა და არც არასდროს საუბარი ნამდვილად არ გაწყობს“.

„მე მგონი, ეს არის გვარამიას და ჩერგოს დაშლის წინანდელი ჭინთვები და სულ ცოტა დარჩა ქართულ საზოგადოებას, რომ რამენაირად მოინელოს ეს პოლიტიკური ნაგავი, რომელიც დიდი ხანია, აბინძურებს ქართულ პოლიტიკურ სივრცეს", - ასე აფასებს „თავისუფალი ხალხის პარტიის “ ლიდერი იაგო ხვიჩია არსებულ დაპირისპირებას.

ვრცლად იხილეთ მარიამ ბუღაძის სიუჟეტში.