დავით ჩიხელიძე: მსოფლიოში ნომერ პირველი აეროპორტის მმართველი გუნდის ინტერესი საქართველოს მიმართ, ქვეყნის სტაბილური განვითარების მკაფიო დადასტურებაა

მსოფლიოში ნომერ პირველი აეროპორტის მმართველი გუნდის ინტერესი საქართველოს მიმართ, ქვეყნის სტაბილური განვითარების მკაფიო დადასტურებაა, - წერს ექსპერტი დავით ჩიხელიძე სოციალურ ქსელში.

მისი განცხადებით, ისეთი გლობალური გიგანტის დაინტერესება, როგორიც სინგაპურის ჩანგის აეროპორტია, ნათლად აჩვენებს, თუ რამდენად მაღალ დონეზეა საქართველოს ავიაციის, ტრანსპორტისა და ტურიზმის სექტორები.

„საქართველოს ეკონომიკისა და მდგრადი განვითარების მინისტრის, მარიამ ქვრივიშვილის განცხადებით, ვაზიანის ახალი საერთაშორისო აეროპორტის პროექტით მსოფლიოში აღიარებული Singapore Changi Airport-ის მმართველი გუნდი დაინტერესდა. სინგაპურის ჩანგის აეროპორტი გლობალურად პირველია მომსახურების ხარისხითა და ოპერირების მაღალი სტანდარტებით. ოფიციალურ შეხვედრაზე კომპანიის წარმომადგენლებმა ფაქტობრივად დაადასტურეს მზადყოფნა, მონაწილეობა მიიღონ საქართველოს მთავრობის მიერ გამოცხადებულ ტენდერში პარტნიორი კომპანიის შერჩევისას.

ისეთი გლობალური გიგანტის დაინტერესება, როგორიც სინგაპურის ჩანგის აეროპორტია, ნათლად აჩვენებს, თუ რამდენად მაღალ დონეზეა საქართველოს ავიაციის, ტრანსპორტისა და ტურიზმის სექტორები. ეს არის პირდაპირი დასტური იმისა, რომ საერთაშორისო ასპარეზზე არსებობს უდიდესი პოზიტიური მოლოდინი ქვეყნის შემდგომი, სტაბილური ეკონომიკური ზრდის მიმართ.

სკეპტიკოსების გასაგონად უნდა ითქვას: შიდა თუ გარე გამოწვევებისა და ხელის შეშლის მცდელობების მიუხედავად, საქართველოს მთავრობა განაგრძობს სახელმწიფოს თანმიმდევრულ განვითარებას. მიმდინარეობს მუშაობა ისეთ მასშტაბურ პროექტებზე, რომლებიც ქვეყნის სტაბილურობასა და პროგრესს არა მხოლოდ დღეს, არამედ ათწლეულების განმავლობაში უზრუნველყოფს.

ქვეყანაში ფუნდამენტურად წესრიგდება და ვითარდება საგზაო და სარკინიგზო ინფრასტრუქტურა, ხოლო საჰაერო ინფრასტრუქტურა სრულიად ახალ სიმაღლეზე ადის, შენდება და ფართოვდება აეროპორტები. მსოფლიო დონის გიგანტების ასეთი აქტიური ინტერესი კიდევ ერთხელ უსვამს ხაზს საქართველოს დიდ პერსპექტივას და ამტკიცებს, რომ ჩვენი ქვეყანა საერთაშორისო ინვესტორებისთვის კვლავ რჩება საიმედო, მიმზიდველ და სასურველ პარტნიორად“, - წერს სოციალურ ქსელში დავით ჩიხელიძე.