დავით მათიკაშვილი ძალადობრივ აქციებზე დაკავებულ პირებზე: ყველა ის პატიმარი, რომელიც გულწრფელად მოინანიებს დანაშაულს, რა თქმა უნდა, შედეგად სახელმწიფოსგან ადეკვატურ, ჰუმანურ მიდგომასაც მიიღებს

ყველა ის პატიმარი, რომელიც გულწრფელად მოინანიებს დანაშაულს, რა თქმა უნდა, შედეგად სახელმწიფოსგან ადეკვატურ, ჰუმანურ მიდგომასაც მიიღებს, - განაცხადა საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა ძალადობრივ აქციებზე, მათ შორის 4 ოქტომბრის საქმეზე დაკავებული პირების მიერ დანაშაულის აღიარების ფაქტების შეფასებისას.

„ეს ძალიან მძიმე საქმეა - სახელმწიფო ინსტიტუციების წინააღმდეგ თავდასხმა, თუმცა ყველა ის პატიმარი, რომელიც გულწრფელად მოინანიებს დანაშაულს, რა თქმა უნდა, შედეგად სახელმწიფოსგან ადეკვატურ, ჰუმანურ მიდგომასაც მიიღებს.

ის პატიმრები, ის ადამიანები, რომლებიც დღეს კვლავაც რჩებიან გისოსებს მიღმა და საკუთარ დანაშაულს არ აღიარებენ, ხაზი უნდა გაესვას, რომ ისინი სწორედ იმ გავლენის ქვეშ არიან, რაც სამწუხაროა. ფაქტობრივად, გარე ძალებმა, რომლებმაც დაგეგმეს 4 ოქტომბერი, სწორედ ამ ძალების ტყვეობის ქვეშ რჩებიან ეს ადამიანები“, - განაცხადა მათიკაშვილმა.

როგორც ცნობილია, 4 ოქტომბრის საქმეზე დაკავებული გიორგი ჩახუნაშვილი საპროცესო შეთანხმების შედეგად, გუშინ გათავისუფლდა, ამავე საქმეზე მსჯავრდებული ზაქრო ალბუთაშვილი კი, საპატიმროს 8 ოქტომბერს დატოვებს.