დავით მათიკაშვილი: არავის აქვს უფლება, ჩაერიოს საპატრიარქოს საქმეში. წმინდა სინოდი თვითონ მიიღებს გადაწყვეტილებას და ეს გადაწყვეტილება იქნება საუკეთესო

საპროცედურო საკითხთა და წესების საპარლამენტო კომიტეტის თავმჯდომარე, დავით მათიკაშვილი ეკლესიაზე რადიკალების თავდასხმას „დღის ქრონიკაში“ გამოეხმაურა.

როგორც მათიკაშვილმა აღნიშნა, რადიკალები ცდილობენ, უცხოეთიდან დაფინანსებული ინიციატივები და სურვილები საქართველოში განხორციელდეს.

„ჩვენი დედაეკლესია არის ჩვენი საზოგადოების, ქართველი ერის, ჩვენი სინდისიერებისა და მორალის სადარაჯოზე. ეს არის ის ზღუდე, რომლის გადალახვა და შემოღწევა ვერც ერთმა მტერმა ვერ შეძლო. ჩვენს ავისმოსურნეებს უნდათ დისონანსის შეტანა, აქ უნდათ შემოღწევა იმისთვის, რომ თავისი შავი მიზნები განახორციელონ.

მსოფლიომ იხილა, როგორ დაიტირა ქართველმა ხალხმა პატრიარქი და დღეს, როდესაც მთელი საქართველო ველოდებით ახალი პატრიარქის არჩევას, არ წყდება შეტევა ჩვენს ეკლესიაზე. მეხუთე კოლონა, რომლის გამორჩეული სახე გახლავთ ექსპრეზიდენტი, მიხეილ სააკაშვილი, ათასგვარ სისაძაგლეს კადრულობს და ცდილობს, ყველაფერი გააკეთოს იმისთვის, რომ უცხოეთიდან დაფინანსებული ინიციატივები და სურვილები საქართველოში განხორციელდეს.

სააკაშვილს მხარს უბამენ რადიკალური დაჯგუფების წარმომადგენლები და მათ შორის ყოფილი სასულიერო პირები, რომლებიც კადრულობენ ეპითეტებით მოიხსენიონ ჩვენი საპატრიარქო. არავის აქვს უფლება, ჩაერიოს საპატრიარქოს საქმეში. წმინდა სინოდი თვითონ მიიღებს გადაწყვეტილებას და ეს გადაწყვეტილება იქნება საუკეთესო“, - აღნიშნა დავით მათიკაშვილმა.

მღვდელმოქმედება შეჩერებულმა არქიმანდრიტმა, დოროთე ყურაშვილმა ერთ-ერთი მედიის ეთერში თქვა, რომ მეუფე შიო ფსიქიკურად გაწონასწორებული არ არის. მანამდე კი მიხეილ სააკაშვილმა პატრიარქის არჩევნებს „ეგრეთ წოდებული“ და „რუსული სპეცოპერაცია“ უწოდა.