დავით მათიკაშვილი განათლების მინისტრის ინტერპელაციაზე: პროვოკაციულად, პოპულისტურად გახარიებს უნდათ საზოგადოებას დაანახონ როგორც რაღაც გამორჩეული გულშემატკივარი ამ მოცემულობის. ღრმად ვართ დარწმუნებული, განათლების მინისტრი ამომწურავ პასუხს გასცემს ყველა კითხვას

ღრმად ვართ დარწმუნებული, რომ განათლების მინისტრი ამომწურავ პასუხს გასცემს ყველა კითხვას, - განუცხადა „ქრონიკას“ საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილმა განათლების მინისტრის ინტერპელაციასთან დაკავშირებით.

კერძოდ, გივი მიქანაძეს გახარიას პარტიამ 44 შეკითხვა გაუგზავნა. შეკითხვები ძირითადად განათლების რეფორმას, განათლების დაფინანსებას, საკადრო პოლიტიკას და ზოგად განათლებას ეხება.

მათიკაშვილის თქმით, პროვოკაციულად, პოპულისტურად გახარიებს უნდათ საკუთარი თავი წარმოაჩინონ და საზოგადოებას დაანახონ როგორც რაღაც გამორჩეული გულშემატკივარი ამ მოცემულობის.

„ამ საკითხთან დაკავშირებით ყველაფერი უკვე ნათქვამია, უკვე არის ინფორმაცია საზოგადოებისთვის გადაცემული. ვინ ვინ და პარლამენტის წევრებმა, მითუმეტეს იმ ადამიანებმა, ვინც პროფილური კომიტეტის, განათლების კომიტეტის წევრები არიან, უნდა იცოდნენ კარგად, თუ რას ეხება განათლების რეფორმა. ის, რაც ინტერპელაციის წესით გაგზავნილი კითხვებიდან ჩვენ ამოვიკითხეთ და ვნახეთ, არის ერთადერთი რამ - პროვოკაციულად, ყოველგვარი საფუძვლის გარეშე, პოპულისტურად გახარიებს უნდათ საკუთარი თავი წარმოაჩინონ და საზოგადოებას დაანახონ როგორც რაღაც გამორჩეული გულშემატკივარი ამ მოცემულობის. არადა, აბსოლუტურად საწინააღმდეგოსთან გვაქვს საქმე.

ჩვენ ღრმად ვართ დარწმუნებული, რომ განათლების მინისტრი ამომწურავ პასუხს გასცემს ყველა კითხვას“, - აღნიშნა მან.