დავით მათიკაშვილი „ნაცმოძრაობაში“ გაწევრების გადასახადის დაწესებაზე: „ნაცმოძრაობა“ კიდევ უფრო ამძიმებს თავისი ერთი მუჭა მხარდამჭერების ფინანსურ მდგომარეობას და პირდაპირ სთხოვს მათ ფულად შენატანს. ეს არის უმძიმესი კრიზისი, პრაქტიკულად დასასრული ამ პარტიისა

დავით მათიკაშვილი „ნაციონალურ მოძრაობაში“ გაწევრიანებაზე გადასახადის დაწესების იდეას ეხმიანება. საპროცედურო საკითხთა და წესების საპარლამენტო კომიტეტის თავმჯდომარე ამას პარტიის დასასრულს უწოდებს.

„დავალების მიმცემები დავალებას აძლევენ „ნაცებს“, თუმცა საქართველოში გატარებულმა შესაბამისმა საკანონმდებლო რეფორმამ აგენტურას დაფინანსების თვალსაზრისით გაურთულა ჯიბეების შევსება, ამიტომაც, ახლა ვხედავთ, რომ ამ მძიმე მდგომარეობაში „ნაცმოძრაობა“ კიდევ უფრო ამძიმებს თავისი ერთი მუჭა მხარდამჭერების ფინანსურ მდგომარეობას და პირდაპირ სთხოვს მათ ფულად შენატანს. ეს არის უმძიმესი კრიზისი, პრაქტიკულად დასასრული ამ პარტიისა“, - მიიჩნევს მათიკაშვილი.

„ნაციონალურ მოძრაობაში“ გაწევრება, სავარაუდოდ, 5 ან 10 ლარიდან დაიწყება. პარტიაში ცვლილებებზე მუშაობენ. იმისთვის, რომ პარტიაში წევრებმა კონკრეტული უფლებები მოიპოვონ, მაგალითად - ხმის მიცემის უფლება, მათ მოუწევთ გარკვეული თანხა გადაიხადონ.