დავით მათიკაშვილი: ფაქტია, რადიკალური აგენტურული ოპოზიციის მხარდამჭერთა რიცხვი კარდინალურად შემცირებულია. პარტია, რომელსაც აქვს ანტისახელმწიფოებრივი, ანტიქართული, ანტიეროვნული ნიადაგი, რომელსაც სურს საკუთარი ქვეყნის ნგრევა, ბუნებრივია, რომ ის არ უნდა იყოს პოლიტიკურ ზედაპირზე. ამიტომაც აბსოლუტურად გამართლებულია ის საკონსტიტუციო სარჩელი, რომელიც შევიტანეთ საკონსტიტუციო სასამართლოში

ფაქტია, რადიკალური აგენტურული ოპოზიციის მხარდამჭერთა რიცხვი კარდინალურად შემცირებულია. პარტია, რომელსაც აქვს ანტისახელმწიფოებრივი, ანტიქართული, ანტიეროვნული ნიადაგი, რომელსაც სურს საკუთარი ქვეყნის ნგრევა, ბუნებრივია, რომ ის არ უნდა იყოს პოლიტიკურ ზედაპირზე. ამიტომაც აბსოლუტურად გამართლებულია ის საკონსტიტუციო სარჩელი, რომელიც შევიტანეთ საკონსტიტუციო სასამართლოში, - განაცხადა „დღის ქრონიკასთან“ საპროცედურო საკითხთა და წესების საპარლამენტო კომიტეტის თავმჯდომარემ დავით მათიკაშვილმა.

მისი თქმით, რა გადაწყვეტილებას მიიღებს სასამართლო, ამის წინასწარ განსაზღვრა შეუძლებელია, მაგრამ სარჩელი იმდენად გამყარებულია არგუმენტებით და ფაქტებით, რომ, სავარაუდოდ, გადაწყვეტილება ისეთი იქნება, როგორსაც „ქართული ოცნება“ ელის.

„იმდენად არგუმენტირებულია ეს სარჩელი და იმდენად მტკიცე არგუმენტებია იქ განსაზღვრული, რომ ძალიან გაუჭირდება მსოფლიოს ნებისმიერ მოსამართლეს საწინააღმდეგო გადაწყვეტილების დაწერა“, - განაცხადა დავით მათიკაშვილმა.

რაც შეეხება საკონსტიტუციო სარჩელში გახარიას პარტიის დამატებას, როგორც დავით მათიკაშვილმა აღნიშნა, თავადვე აღიარებენ, რომ დესტრუქციულ ძალას წარმოადგენენ.

„ფარულავამ თქვა, რომ 4 ოქტომბერს, როდესაც ვერ შედგა რევოლუცია, ვერ დაამხეს ქვეყანა საკუთარ ხალხს თავზე, მხოლოდ მას მერე გადაწყვიტეს პარლამენტში შემოსვლა. ამით პირდაპირ დაადასტურა პარტიის წარმომადგენელმა, რომ ეს პარტია წარმოადგენს „ნაცმოძრაობის“ და იმ ექსტრემისტული, რადიკალური ძალების შემადგენელ ნაწილს, რომლებსაც სურდათ, რომ 4 ოქტომბერი გადაქცეულიყო ქვეყნის ნგრევის, ხელისუფლების ნგრევის და საქართველოს ნგრევის დღედ. მარტო იმიტომ გადაწყვიტეს პარლამენტში შემოსვლა, რომ მოუცვდათ კბილი. ეს არის პირდაპირი დასტური და პირდაპირი აღიარება. მის გარდა ჩვენ პირდაპირ შეგვიძლია ვილაპარაკოთ იმ არაერთ მტკიცებულებაზე, რომლებიც მათ უშუალო კავშირს ადასტურებს „ნაციონალურ მოძრაობასთან“ - დაწყებული გახარიას ღალატით, საკუთარი თანამდებობის მიტოვებით და ქვეყნის საფრთხის ქვეშ ჩაგდებით, დამთავრებული იმით, თუ არჩევნების შემდგომ როგორ შექმნეს ალიანსები სხვადასხვა საკრებულოში „ნაცმოძრაობასთან“ ერთად. როგორ შექმნი ალიანსს ისეთ პარტიასთან, რომელთანაც იდეოლოგიური თანხმობა და ურთიერთშეთავსება არ გაგაჩნია?!

მიუხედავად იმისა, რომ პოლიტიკური შატალო დაასრულეს და შემობრძანდნენ პარლამენტში, ისინი აგრძელებენ და არ ღალატობენ ხელისუფლების ლეგიტიმაციის არაღიარებას, კონსტიტუციის შეურაცხყოფას“, - განაცხადა დავით მათიკაშვილმა.