დავით მათიკაშვილი: პოლიტიკური ტერორი არის თანამედროვეობის გამოწვევა, სამწუხაროდ, საქართველოს ამის ძალიან დიდი გამოცდილება აქვს

პოლიტიკური ტერორი არის თანამედროვეობის გამოწვევა და საქართველოს სამწუხაროდ ამის ძალიან დიდი გამოცდილება აქვს, - განაცხადა საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილმა.

უმრავლესობის დეპუტატმა ვაშინგტონში გამართულ „პოლიტიკური ტერორიზმის ხელახალი გააქტიურების შესახებ“ სამიტთან დაკავშირებით გააკეთა კომენტარი.

„ჩვენ წლების განმავლობაში როგორც შიდა აგენტურული ოპოზიციისგან, ასევე გარე ძალებისგან განვიცდიდით მუდმივ პოლიტიკურ თავდასხმებს. ამის მიმართ სახელმწიფოს მედეგობა და იმუნიტეტი ის მნიშვნელოვანი ფაქტორია, რომლის გამოცდილების გაზიარებაც იქნება მეტად მნიშვნელოვანი სხვა ქვეყნებისთვისაც“, - განაცხადა მათიკაშვილმა.

საქართველოს საგარეო საქმეთა მინისტრმა, ვაშინგტონში გამართულ „პოლიტიკური ტერორიზმის ხელახალი გააქტიურების შესახებ“ მინისტერიალში მიიღო მონაწილეობა. მაკა ბოჭორიშვილი მინისტერიალზე ამერიკის შეერთებული შტატების სახელმწიფო მდივნის, მარკო რუბიოს მიწვევით იმყოფება.