დავით ქართველიშვილი: კახეთი აღარ არის უბრალოდ „საქართველოს აღმოსავლეთი“ - ის ხდება იმ მარშრუტის ნაწილი, რომელიც კასპიის ზღვაზე ბევრად შორს იწყება და შავ ზღვაზე ბევრად შორს მთავრდება

მსოფლიო ბანკი და აზიის ინფრასტრუქტურული ინვესტიციების ბანკი ასობით მილიონ დოლარს დებენ აღმოსავლეთ საქართველოს სატრანსპორტო ინფრასტრუქტურის მოდერნიზაციაში ტრანსკასპიური დერეფნის ფარგლებში - მარშრუტში, რომელიც კასპიის ზღვის, აზერბაიჯანის, საქართველოსა და თურქეთის გავლით ევროპულ ბაზარს უკავშირდება, - წერს სოციალურ ქსელში პარტია „ხალხის ძალის“ წევრი დავით ქართველიშვილი.

მისი თქმით, მსოფლიო ბანკმა გამოაქვეყნა კვლევა, რომლის თანახმადაც, აუცილებელი ინვესტიციებისა და ლოჯისტიკური დაბრკოლებების აღმოფხვრის შემთხვევაში, ტრანსკასპიურ დერეფანს 2040 წლისთვის ვაჭრობის მოცულობის სამჯერ მეტად გაზრდა, გადაზიდვის დროის დაახლოებით განახევრება და დამატებითი სამუშაო ადგილების შექმნა შეუძლია.

„გარდა ტრადიციული რთველისა, ამ შემოდგომას კახეთი კიდევ ერთი მნიშვნელოვანი გარემოებით ქმნის ქვეყნის დღის წესრიგს. კახეთს ერთი შესანიშნავი თვისება აქვს: აქ დიდი საქმეების კეთება სრულიად მშვიდი და უემოციო სახით შეუძლიათ. სხვაგან თუ იტყოდნენ: „ჩვენ ვაშენებთ საერთაშორისო სატრანსპორტო დერეფნის ნაწილს, რომელიც აზიასა და ევროპას აკავშირებს“, კახეთში იტყვიან: „დიდი ამბავი, გზაა. ჰო, ნუ, როგორც იქნა“. არადა, ამ „ჰოს“ უკან გაცილებით მასშტაბური პროექტი დგას, ვიდრე უბრალოდ ჩვეულებრივი გზის გაყვანაა.

მსოფლიო ბანკი და აზიის ინფრასტრუქტურული ინვესტიციების ბანკი ასობით მილიონ დოლარს დებენ აღმოსავლეთ საქართველოს სატრანსპორტო ინფრასტრუქტურის მოდერნიზაციაში ტრანსკასპიური დერეფნის ფარგლებში - მარშრუტში, რომელიც კასპიის ზღვის, აზერბაიჯანის, საქართველოსა და თურქეთის გავლით ევროპულ ბაზარს უკავშირდება. საქართველოს TC-GATE პროექტის საერთო ღირებულება 750 მილიონ დოლარს აღემატება, ხოლო AIIB-მა სულ ახლახან ამისთვის 181,07 მილიონი დოლარის დაფინანსება დაამტკიცა. ანუ კახეთი, რომელიც დიდი ხანია საქართველოს აღმოსავლეთ კარიბჭედ მიიჩნევს თავს, ახლა იმის დამტკიცების შესაძლებლობას იღებს, რომ ის არა მხოლოდ ვენახით, ხაშლამითა თუ ჩურჩხელებით შემოიფარგლება.

თანაც, საქმე მხოლოდ რუკაზე ლამაზად გავლებული ხაზის დახატვას არ ეხება. აშენდება ბადიაური - ჩალაუბნისა და ჩალაუბანი - ბაკურციხის ოთხზოლიანი გზის მონაკვეთები - საერთო ჯამში დაახლოებით 31 კილომეტრის სიგრძის, ასევე მოდერნიზდება გურჯაანი-თელავის 36,6-კილომეტრიანი გზა. ახალი მარშრუტი გადაადგილებას უფრო სწრაფს, უსაფრთხოსა და წყალდიდებებისა და მეწყრების მიმართ უფრო მდგრადს გახდის; პროექტი ითვალისწინებს ხიდებს, გზაგამტარებს, გზების ციფრულ მართვასა და ინტელექტუალურ სატრანსპორტო სისტემებს. კახელისთვის კი ყველაზე საინტერესო ის არის, რომ მსოფლიო ბანკის გათვლით, თელავიდან ფოთის პორტამდე მგზავრობის დრო დაახლოებით 43 წუთით შემცირდება.

აქ კიდევ ერთი, სრულიად განსაკუთრებული აზერბაიჯანულ-ქართული ამბავია: კახისა და ზაქათალის ჩვენი თანამემამულეები კახეთის განახლებული საგზაო მონაკვეთის განვითარებით უფრო სწრაფ და მოსახერხებელ წვდომას მიიღებენ საქართველოს სატრანსპორტო სისტემასთან, შემდეგ უკვე - შავ ზღვასთან. ანუ კახიდან ადამიანი, რომელსაც ზაფხულში საქართველოს ზღვისპირეთში წასვლა მოუნდება, მხოლოდ ახალ გზას კი არ მიიღებს, არამედ ის უფრო მოკლე გზას იპოვის საერთო ეკონომიკური და ადამიანური ინტერესების სივრცეში. ეს სწორედ ის მარშრუტია, რომელზეც დღეს საქონლის გადაადგილებაზე ვსაუბრობთ და რომელიც ხვალ სრულიად თავისუფლად შეიძლება ადამიანების, ტურისტების, მეწარმეების, ოჯახებისა და სტუმრების მარშრუტადაც იქცეს. ეს კი, ალბათ, შუა დერეფნის ერთ-ერთი ყველაზე სასიამოვნო თავისებურებაა: ის მხოლოდ კონტეინერებს არ აერთებს, ის თანდათან მეზობლებსაც აერთიანებს.

და სწორედ ამიტომ არის კახეთის ახალი სატრანსპორტო მონაკვეთი გაცილებით უფრო დიდი, ვიდრე უბრალოდ გზის ისტორია. მსოფლიო ბანკმა სულ ახლახან გამოაქვეყნა კვლევა, რომლის თანახმადაც, აუცილებელი ინვესტიციებისა და ლოგისტიკური დაბრკოლებების აღმოფხვრის შემთხვევაში, ტრანსკასპიურ დერეფანს 2040 წლისთვის ვაჭრობის მოცულობის სამჯერ გაზრდა, გადაზიდვის დროის დაახლოებით განახევრება და დამატებითი სამუშაო ადგილების შექმნა შეუძლია. ამ კონსტრუქციაში კი კახეთი აღარ არის უბრალოდ „საქართველოს აღმოსავლეთი“, სადაც სპეციალურად უნდა გადაუხვიო - ის ხდება მარშრუტის ნაწილი, რომელიც კასპიის ზღვაზე ბევრად შორს იწყება და შავ ზღვაზე ბევრად შორს მთავრდება“, - წერს დავით ქართველიშვილი.