დავით ქართველიშვილი: ფაშინიანის დამარცხება შესაძლოა საქართველოსთვის დამატებითი პრობლემების წყაროდ იქცეს
პარტია „ხალხის ძალის” წევრი დავით ქართველიშვილი სოციალურ ქსელში სომხეთში მიმდინარე პოლიტიკურ პროცესებსა და მათ შესაძლო გავლენას საქართველოზე აფასებს და აღნიშნავს, რომ სომხეთში პოლიტიკური სტაბილურობის შენარჩუნება საქართველოს ინტერესებში შედის, რადგან რეგიონში ნებისმიერი კრიზისი ეკონომიკურ და უსაფრთხოების რისკებს ზრდის.
„დღეს თბილისს არ სჭირდება კიდევ ერთი არასტაბილურობის კერა საკუთარი საზღვრების მახლობლად - მას სჭირდება მაქსიმალურად მშვიდი და პროგნოზირებადი სამხრეთ კავკასია,”- განაცხადა ანალიტიკოსმა და განმარტა, რომ ნიკოლ ფაშინიანის გამარჯვება საქართველოს პირდაპირ გამარჯვებას არ ნიშნავს, თუმცა არსებული პოლიტიკური კურსის შენარჩუნება რეგიონში პროგნოზირებად გარემოს უზრუნველყოფს.
„ერევნის არჩევნებამდე ექვსი დღით ადრე, ამასაც დავუთმოთ ჩვენი მოსაზრება. ნიკოლ ფაშინიანის გამარჯვება საქართველოსთვის ობიექტურად ხელსაყრელია არა იმიტომ, რომ თბილისი სრულად იზიარებს ერევნის ყველა გადაწყვეტილებას, არამედ იმიტომ, რომ ეს სამხრეთ კავკასიაში პროგნოზირებად გარემოს ინარჩუნებს. ქვეყნისთვის, რომელიც ბოლო წლებში რეგიონის უმნიშვნელოვანეს სატრანზიტო კვანძად იქცა, მეზობლების სტაბილურობას გაცილებით მეტი მნიშვნელობა აქვს, ვიდრე მათ იდეოლოგიურ ორიენტაციას.
საქართველო დაინტერესებულია სატრანსპორტო დერეფნების გამართულ ფუნქციონირებაში, ვაჭრობის ზრდასა და ახალი ომების თავიდან აცილებაში. სომხეთში ნებისმიერი პოლიტიკური კრიზისი ავტომატურად ქმნის რისკებს მთელი რეგიონის ეკონომიკისთვის, მაშინ როდესაც არსებული კურსის შენარჩუნება ნიშნავს თამაშის უკვე ცნობილი და გასაგები წესების შენარჩუნებას.
პარადოქსი ის არის, რომ რაც უფრო აქტიურად ცდილობს სომხეთი თავისი საგარეოპოლიტიკური შემობრუნების დემონსტრირებას, მით უფრო ხელსაყრელად გამოიყურება საქართველოს მოდელი.
მაშინ, როცა ერევანი დასავლეთისთვის საკუთარი გეოპოლიტიკური მნიშვნელობის დამტკიცებას ცდილობს, თბილისი აჩვენებს უნარს, შეინარჩუნოს სამუშაო ურთიერთობები სხვადასხვა ძალის ცენტრთან ერთდროულად. შედეგად, სწორედ საქართველო აღიქმება დღეს სამხრეთ კავკასიის ყველაზე სტაბილურ, პრაგმატულ და პროგნოზირებად სახელმწიფოდ. ეს აძლიერებს ქვეყნის მოლაპარაკებით პოზიციებს და ზრდის მის მნიშვნელობას საერთაშორისო სატრანსპორტო და საინვესტიციო პროექტებისთვის.
