დეკანოზი ანდრია ჯაღმაიძე: წინა წლებში ევროპარლამენტარები ასე არ ლაპარაკობდნენ ჩვენთან. მაგალითად იანოშ ჰერმანი ძალიან მეგობრული ურთიერთობებით გამოირჩეოდა სხვებისგან განსხვავებით. მის დროს ძალიან ბევრი კარგი საქმეები გაკეთდა ევროპასთან მიმართებაში

დეკანოზი ანდრია ჯაღმაიძე გადაცემა „იმედის კვირაში“ იხსენებს რომ 2018 წლამდე ევროკავშირს, რომელსაც იანოშ ჰერმანი წარმოადგენდა, საპატრიარქოსთან საკმაოდ კარგი ურთიერთობები ჰქონდა და არაერთხელ მიუღიათ ელჩისგან დაპირება რომ ევროინტეგრაციის სანაცვლოდ საქართველოსგან არ მოითხოვნენ ტრადიციულ ღირებულებებზე უარის თქმას.

მისივე თქმით, წინა წლებში ევროპარლამენტარები სულ სხვაგვარად საუბრობდნენ საპატრიარქოსთან.

„წინა წლებში ევროპარლამენტარები ასე არ ლაპარაკობდნენ ჩვენთან. მაგალითად იანოშ ჰერმანი ძალიან მეგობრული ურთიერთობებით გამოირჩეოდა სხვებისგან განსხვავებით. მის დროს ძალიან ბევრი კარგი საქმეები გაკეთდა ევროპასთან მიმართებაში. არაერთხელ უთქვამს ოფიციალურ თუ კერძო შეხვედრებში, რომ ევროკავშირი არის სხვადასხვა ქვეყნების კულტურული გაერთიანებაც და საქართველო თავისი კულტურით და ტრადიციებით კიდევ უფრო გაამრავალფეროვნებდა და არ იქნებოდა არანაირი მოთხოვნა ევროკავშირში გაწევრიანების გზაზე, რომ საქართველოს დაეთმო თავისი ტრადიციები და ქრისტიანული ფასეულობები.

ეს ადამიანი არაფორმალურ გარემოშიც გვსტუმრობდა სასულიერო პირებს და თავისუფლად ვლაპარაკობდით და ბევრ რამეში ემთხვეოდა ჩვენი შეხედულებები. სწორედ ასეთი დამოკიდებულების გამო, იმ დროს საპატრიარქოს რამდენიმე განცხადება იყო, რომ საპატრიარქო მიესალმება პოლიტიკას ევროსტრუქტურებში გაერთიანებაში, მათ შორის პატრიარქის განცხადებაც არსებობდა ამაზე. თუმცა ყველა ეს განცხადება იყო დათქმით, რომ ქართული ტრადიციული ფასეულობები, ქრისტიანული ღირებულებები იქნებოდა შენარჩუნებული“, - აღნიშნა დეკანოზმა.