Deutsche Welle: აშშ-ის ჯარების გასვლამ შესაძლოა გერმანიაში სამუშაო ადგილების მასშტაბური შემცირება გამოიწვიოს

მანჰაიმში ბაზირებული ეკონომიკური კვლევების ცენტრისა (ZEW) და კიოლნის უნივერსიტეტის მიერ ჩატარებული კვლევის თანახმად, აშშ-ის ჯარების ფართომასშტაბურმა გაყვანამ შესაძლოა გერმანიას ათასობით სამუშაო ადგილი დაუკარგოს. ინფორმაციას ამის შესახებ გამოცემა Deutsche Welle ავრცელებს.

მაისის დასაწყისში აშშ-მა გამოაცხადა, რომ გერმანიიდან 5 000 სამხედროს გაიყვანდა, მოგვიანებით კი დონალდ ტრამპმა განაცხადა, რომ სამხედრო კონტინგენტის კიდევ უფრო შემცირება იგეგმებოდა.

კვლევამ შეისწავლა ამ გეგმების შესაძლო შედეგები 1990-იანი წლების ჯარების გაყვანის გამოცდილებაზე დაყრდნობით. იმ პერიოდში, ცივი ომის დასრულების შემდეგ, გერმანია დაახლოებით 200 000-მა ამერიკელმა ჯარისკაცმა დატოვა.

„ჯარების გაყვანის ეფექტი ბევრად გასცდა აშშ-ის სამხედრო ბაზებზე დასაქმებულთა უშუალო დათხოვნას. გაუქმებული სამუშაო ადგილების დაახლოებით 61% რეგიონულ ბიზნესებზე მოდიოდა. შემოსავლების მნიშვნელოვანი კლება გამოიწვია ჯარისკაცებისა და მათი ოჯახების მხრიდან სამომხმარებლო ხარჯების გაქრობამ“, - განაცხადა კვლევის თანაავტორმა, იაკობ შმიდჰოიზერმა.