დონალდ ტრამპი ჯორჯია მელონიზე: შემაკავებელი ორდერია საჭირო

აშშ-ის პრეზიდენტი დონალდ ტრამპი იტალიის პრემიერ-მინისტრთან ურთიერთობებს მორიგ პოსტს უძღვნის. საკუთარ სოციალურ ქსელში Truth Social ტრამპმა გამოაქვეყნა ფოტო, რომელზეც მელონი მას ღიმილით უყურებს. ფოტოზეა დატანილი წარწერა: „შემაკავებელი ორდერია საჭირო“.

შემაკავებელი ორდერი არის აღკვეთის ღონისძიება, რომელიც მოძალადეების/მადევრების მიმართ გამოიყენება: სასამართლოს გადაწყვეტილებით, დამრღვევს ევალება, გარკვეულ მანძილზე არ მიუახლოვდეს იმ ადამიანს, რომელიც მისი აკვიატებული ყურადღების ობიექტი გახდა. ამგვარად, აშშ-ის პრეზიდენტმა სარკასტულად გააშარჟა ფოტოზე აღბეჭდილი მელონის სახის გამომეტყველება.

პოსტი ანკარაში ნატოს სამიტის დაწყებამდე რამდენიმე საათით ადრე გამოქვეყნდა, რომელშიც სავარაუდოდ, ორივე ლიდერი მიიღებს მონაწილეობას.

ეს განცხადება კიდევ უფრო აღრმავებს განხეთქილებას აშშ-ის პრეზიდენტსა და იტალიის პრემიერ-მინისტრს შორის, რაც ორ ქვეყანას შორის ურთიერთობების შემდგომ გაცივებაზე მიანიშნებს.

უთანხმოება ჯერ კიდევ 2026 წლის გაზაფხულზე დაიწყო - ახლო აღმოსავლეთისა და ირანის კრიზისების მართვის ირგვლივ არსებული დავების, რომის პაპ ლეო XIV-ის მიმართ ტრამპის კრიტიკისა და ნატოს ფარგლებში ამერიკის ადმინისტრაციის მთელი რიგი მოთხოვნების შესრულებაზე იტალიის უარის ფონზე.

გარდამტეხი მომენტი 19 ივნისს დადგა, როდესაც დონალდ ტრამპმა ინტერვიუში განაცხადა, რომ „დიდი შვიდეულის“ სამიტის კულუარებში მელონი მას „ერთობლივი ფოტოს გადაღებას ეხვეწებოდა“, თავად კი ამაზე მხოლოდ „სიბრალულის გამო“ დათანხმდა.

იტალიის პრემიერმა ამ მტკიცებებს „სრულიად გამოგონილი“ უწოდა და ხაზგასმით აღნიშნა, რომ „არც მე და არც იტალია არავის არაფერს ვეხვეწებით“.