ძლიერმა სეტყვამ და ქარმა დედოფლისწყაროსა და ახმეტის მუნიციპალიტეტები დააზარალა

სტიქია დედოფლისწყაროში - ძლიერმა სეტყვამ და ქარმა მუნიციპალიტეტის სოფლები დააზარალა. განსაკუთრებულად რთული ვითარება იყო სოფელ გამარჯვებაში, დაზიანდა სახლების სახურავები, ელექტროგადამცემი ხაზები, მოგლეჯილია მრავალწლოვანი კაკლის ხეები და ნაძვები.

„მუნიციპალიტეტის ყველა სოფელში იყო ძლიერი წვიმა, მაგრამ განსაკუთრებით ზარალი მიადგა სოფელ გამარჯვებას, სადაც სტიქიამ წააქცია ხეები, დაზიანდა ელექტროგადამცემი ხაზების ნაწილი. გზები ჩაკეტილი იყო, მაგრამ რეაგირება ოპერატიულად მოხდა, როგორც მუნიციპალური სამსახურების, ასევე სახანძრო-სამაშველო და ყველა იმ სამსახურის მხრიდან, რომელსაც ეხებოდა, სხვადასხვა მიმართულება“, - განაცხადა დედოფლისწყაროს მერმა, ნიკოლოზ ჯანიაშვილმა.

ძლიერმა წვიმამ პრობლემები შექმნა ახმეტის მუნიციპალიტეტშიც. უხვი ნალექის შედეგად სანიაღვრე არხებმა წყლის დიდი ნაკადი ვერ გაატარა, რის გამოც სოფელ მატანში რამდენიმე საცხოვრებელი სახლის ეზო, სარდაფი და პირველი სართული დაიტბორა. სტიქიის შემსწავლელი კომისია, საჭიროების შემთხვევაში, მიყენებულ ზარალს აღწერს.

„ძლიერი წვიმის გამო სანიაღვრე არხებმა მოვარდნილი წყლის დიდი ნაკადი ვერ გაატარა და რამდენიმე საცხოვრებელი სახლი დაიტბორა. სასოფლო-სამეურნეო სავარგულების კუთხით ზარალი არ გვაქვს“, - განაცხადა სოფელ მატნის მაჟორიტარმა დეპუტატმა გიორგი მამუჩარაშვილმა.