ეკონომიკის მინისტრის მოადგილე გაეროს ევროპის ეკონომიკური კომისიის რეგიონულ მრჩეველს შეხვდა

საქართველოს ეკონომიკისა და მდგრადი განვითარების მინისტრის მოადგილე ინგა ფხალაძე გაეროს ევროპის ეკონომიკური კომისიის (UNECE) რეგიონულ მრჩეველს, ოლეგ ძიუბინსკის შეხვდა. მხარეებმა მიმდინარე ენერგეტიკული პროექტები, საქართველოს გამოწვევები სექტორში და ქვეყანაში განახლებადი ენერგიის ათვისების შესაძლებლობები განიხილეს.

მინისტრის მოადგილემ ისაუბრა საქართველოსა და რეგიონში მიმდინარე პერსპექტიული პროექტების - მათ შორის შავი ზღვის წყალქვეშა კაბელისა და მწვანე ენერგეტიკული დერეფნის მიმდინარეობისა და მნიშვნელობის შესახებ.

როგორც ინგა ფხალაძემ აღნიშნა, ენერგეტიკულ პროექტებში სამართლიანი ტრანზიციის პრინციპების ინტეგრაცია მნიშვნელოვანია და სახელმწიფო უკვე მუშაობს ამ მიმართულებით შესაბამისი კანონმდებლობის შემუშავებისთვის.

საქართველოს ეკონომიკისა და მდგრადი განვითარების სამინისტროსა და UNECE – ს თანაორგანიზებით, 28 მაისს გაიმართება შეხვედრა სახელწოდებით - „სამართლიანი ტრანზიცია ყველასთვის: საქართველოს სამართლიანი ტრანზიციის გზამკვლევის შემუშავება მდგრადი და ნახშირბად-ნეიტრალური სისტემისთვის.“ შეხვედრის ფარგლებში სახელმწიფო უწყებებს, კომპანიებსა და სხვადასხვა ჩართულ ორგანიზაციებს წარედგინებათ UNECE-ს მიერ შემუშავებული კვლევა, რომელიც აერთიანებს ენერგეტიკის სექტორში სამართლიანი ტრანზიციის საჭიროებებს, შესაძლებლობებსა და რეკომენდაციებს.

საქართველო 1993 წლიდან UNECE-ს წევრია. ენერგეტიკის განვითარების მიმართულებით ქვეყანა კომისიასთან აქტიურად თანამშრომლობს ენერგოეფექტურობისა და განახლებადი ენერგიის წახალისების კუთხით და ჩართულია სხვადასხვა რეგიონულ ინიციატივებსა და საერთაშორისო პროექტებში.