ეკონომიკისა და მდგრადი განვითარების მინისტრი მარიამ ქვრივიშვილი უმსხვილესი ჩინური ავტომწარმოებლის BAIC International - ის თავმჯდომარეს შეხვდა
ეკონომიკისა და მდგრადი განვითარების მინისტრი მარიამ ქვრივიშვილი უმსხვილესი ჩინური ავტომწარმოებლის BAIC International - ის თავმჯდომარეს ფუ ძუნს კომპანიის სათავო ოფისში შეხვდა.
შეხვედრაზე მინისტრმა წარმოადგინა საქართველოს ეკონომიკის განვითარების კორპორაციის დაკვეთით მომზადებული კვლევა ქვეყანაში ელექტრომობილების საწარმოს შექმნის შესაძლებლობის შესახებ და BAIC International - ის მხარესთან თანამშრომლობის პერსპექტივებზე გაამახვილა ყურადღება.
შეხვედრაზე განიხილეს, ელექტრომობილების საქართველოში წარმოების შემთხვევაში, მათი ექსპორტის პოტენციალი, მათ შორის ევროპის ქვეყნების ბაზრებზე თავისუფალი ვაჭრობის შეთანხმების ფარგლებში.
მხარეები შეთანხმდნენ, რომ ჩინური კომპანია საქართველოში, ორმხრივი სამუშაო პროცესის წარმართვის მიზნით, სამუშაო ჯგუფს გამოგზავნის.
ხაზი გაესვა იმ წარმატებას, რომელიც ჩინურ ავტომწარმოებელს აქვს როგორც ჩინეთის, ისე საერთაშორისო ბაზრებზე. თავის მხრივ, BAIC International - ის მხარემ დეტალურად ილაპარაკა კომპანიის განვითარების სტრატეგიულ საკითხებზე, საერთაშორისო ბაზრებზე მათი საქმიანობისა და გეოგრაფიული არეალის გაფართოების შესაძლებლობაზე.
BAIC International - ის სათავო ოფისში მინისტრსა და დელეგაციის წევრებს კომპანიის მიერ წარმოებული ავტომობილები BAIC International - ის თავმჯდომარემ წარუდგინა.
შეხვედრაზე ასევე იმყოფებოდნენ მინისტრის მოადგილეები ირაკლი ნადარეიშვილი, თამარ იოსელიანი და გენადი არველაძე.
ინფორმაციას ეკონომიკისა და მდგრადი განვითარების სამინისტრო ავრცელებს.
იმედი
წყარო: imedinews.ge