ელენე ხოშტარიას ექიმის განცხადებით, კვლევების პირველადი შედეგები უკვე მიღებულია, თუმცა საბოლოო სამედიცინო შეფასება ექიმთა კონსილიუმის შემდეგ გაკეთდება

პატიმარ ელენე ხოშტარიას მკურნალი ექიმის განცხადებით, „ვივამედში“ ჩატარებული კვლევების პირველადი შედეგები უკვე მიღებულია, თუმცა საბოლოო სამედიცინო შეფასება ექიმთა კონსილიუმის შემდეგ გაკეთდება. მისივე ინფორმაციით, კონსილიუმში მონაწილეობას ონლაინ მიიღებენ როგორც ქართველი, ისე უცხოელი სპეციალისტები. სწორედ მათი ერთობლივი დასკვნის საფუძველზე გადაწყდება პაციენტის შემდგომი მკურნალობის ტაქტიკა და დამატებითი კვლევების, მათ შორის რადიოლოგიური გამოკვლევების ჩატარების აუცილებლობა.

„გავეცანით დღეს კვლევებს და გავივლით ჩვენს კოლეგებთან ერთად ონლაინ კონსილიუმზე, როგორც საქართველოში მყოფ, ისე საზღვრებს გარეთ მყოფ ქართველ მაღალკვალიფიციურ სხვადასხვა მიმართულების მქონე ექიმებთან. ამ კონსილიუმის შემდგომ მივიღებთ გადაწყვეტილებას რადიოლოგიური კვლევების ჩატარების შესახებ. ჩვენ გვაქვს ჩვენი მოსაზრება, თუ ისინი გამოთქვამენ სურვილს, რომ მკურნალობის დაწყებამდე, რისკების გადაზღვევისთვის, რომელზეც ვსაუბრობთ უკვე უკანასკნელი დღეების მანძილზე, დამატებით სხვა რადიოლოგიური ან ლაბორატორიული კვლევები უნდა ჩატარდეს, ამასაც ჩავატარებთ მათი მითითებით“, - განაცხადა ანი ქავთარაძემ.