ეროვნულ თავდაცვის აკადემიაში მაგისტრატურის VIII გამოშვების საზეიმო ცერემონია გაიმართა
დავით აღმაშენებლის სახელობის საქართველოს ეროვნულ თავდაცვის აკადემიაში მაგისტრის ხარისხი 40 მსმენელს მიენიჭა. ინფორმაციას თავდაცვის სამინისტრო ავრცელებს.
სამაგისტრო პროგრამის დასრულების ღონისძიება აკადემიის სააქტო დარბაზში გაიმართა. კურსდამთავრებულებს სიტყვით მიმართა ეროვნული თავდაცვის აკადემიის მეთაურმა, ბრიგადის გენერალმა მამია ბალახაძემ. მან ხაზი გაუსვა სამაგისტრო პროგრამების უპირატესობას, ცოდნის გაღრმავების მნიშვნელობას და მაგისტრებს პროფესიული წინსვლა უსურვა. პროგრამის კურსდამთავრებულებს შესაბამისი დიპლომები და სიგელები გადაეცათ.
მაგისტრატურის მსმენელებმა სწავლა წარმატებით დაასრულეს შემდეგი ოთხი სპეციალიზაციით: საერთაშორისო ურთიერთობები და სამხედრო დიპლომატია, თავდაცვის ანალიზი, უსაფრთხოების კვლევები და სახელმწიფო რესურსების მართვა. თავდაცვის ძალების სამხედრო მოსამსახურეების გარდა, კურსდამთავრებულებს შორის იყვნენ სხვადასხვა სახელმწიფო უწყების წარმომადგენლები, მათ შორის შინაგან საქმეთა სამინისტროდან, ეკონომიკისა და მდგრადი განვითარების სამინისტროდან და აფხაზეთის ავტონომიური რესპუბლიკის ფინანსთა და ეკონომიკის სამინისტროდან. წელს მაგისტრატურა პირველად დაამთავრეს იმ სამოქალაქო პირებმა, რომლებიც სახელმწიფო უწყებებში არ არიან დასაქმებული.
ეროვნული თავდაცვის აკადემია ოთხ სამაგისტრო საგანმანათლებლო პროგრამას ახორციელებს, სადაც 18 საგანი ისწავლება. სწავლის შესაძლებლობა თავდაცვისა და უსაფრთხოების სფეროთი დაინტერესებულ ნებისმიერ მოქალაქეს აქვს.
იმედი
წყარო: imedinews.ge