ესპანეთმა პორტუგალია დაამარცხა და მეოთხედფინალის საგზური მოიპოვა

აშშ-ში, კანადასა და მექსიკაში მიმდინარე ფეხბურთის მსოფლიო ჩემპიონატზე ესპანეთის ნაკრები მეოთხედფინალში გავიდა. მერვედფინალურ დაპირისპირებაში ევროპის მოქმედმა ჩემპიონებმა პორტუგალიის ნაკრები დაძაბულ ბრძოლაში, ანგარიშით 1:0 დაამარცხეს.

დალასში გამართული შეხვედრის ბედი მატჩის მიწურულს გადაწყდა - ერთადერთი და გადამწყვეტი გოლი მსაჯის მიერ კომპენსირებულ პირველ წუთზე (90+1) მიკელ მერინომ გაიტანა.

ესპანეთისთვის ეს გამარჯვება ისტორიული მნიშვნელობისაა, რადგან გუნდი მსოფლიო ჩემპიონატის მეოთხედფინალში 2010 წლის შემდეგ პირველად გავიდა. აღსანიშნავია, რომ სწორედ 2010 წელს გახდა ესპანეთი პირველად და ჯერჯერობით ერთადერთხელ მსოფლიო ჩემპიონი.

მეოთხედფინალში ესპანელები აშშ-სა და ბელგიას შორის გამარჯვებულს შეხვდებიან. ეს მატჩი თბილისის დროით სამშაბათს, 04:00 საათზე დაიწყება.

მსოფლიო ჩემპიონატი 19 ივლისს დასრულდება.