eTwinning-ის პლატფორმაზე რეგისტრაცია გრძელდება

მასწავლებელთა პროფესიული განვითარების ეროვნული ცენტრი პროგრამა eTwinning-ის პლატფორმაზე გაწევრიანების (რეგისტრაციის) მსურველი მასწავლებლებისთვის საინფორმაციო და ტექნიკური მხარდაჭერის მიზნით შეხვედრებს აწყობს. ინფორმაციას მასწავლებელთა პროფესიული განვითარების ეროვნული ცენტრი ავრცელებს.

შეხვედრების თემაა – „ევროპული სასკოლო განათლების პლატფორმაზე (ESEP) მუშაობა და eTwinning-ის პროექტების ინიცირება“.

შეხვედრების მონაწილეებს შესაძლებლობა ეძლევათ გამოცდილი სპეციალისტების დახმარებით ჩაერთონ საერთაშორისო საგანმანათლებლო თანამშრომლობაში. გაეცნონ საერთაშორისო პარტნიორების მოძიებისა და ერთობლივი პროექტების დაგეგმვის საშუალებებს, მასწავლებელთა პროფესიული განვითარების მექანიზმებს და წარმატებული საერთაშორისო პროექტების პრაქტიკულ მაგალითებს.

eTwinning არის ევროპული სასკოლო თანამშრომლობის პლატფორმა, რომელიც ხელს უწყობს განათლების სფეროში საერთაშორისო გამოცდილების გაზიარებასა და ინოვაციური პრაქტიკის განვითარებას. პროგრამის ძირითადი სამუშაო სივრცე (ESEP) 27 ენაზე, მათ შორის ქართულ ენაზეც ფუნქციონირებს.

პროგრამა eTwinning საქართველოში მასწავლებელთა პროფესიული განვითარების ეროვნული ცენტრის მხარდაჭერით უკვე 12 წელია ხორციელდება. ამჟამად, საქართველოდან პორტალზე 6000-მდე მასწავლებელია რეგისტრირებული. ქართველი მასწავლებლების მონაწილეობით განხორციელდა 6549 პროექტი, რომელთაგან 1704-ს მინიჭებული აქვს ევროპის ხარისხის ნიშანი (EQL).

ევროპული სასკოლო განათლების პლატფორმაზე გაწევრიანება ნებისმიერ მასწავლებელს დამოუკიდებლადაც შეუძლია.

პლატფორმაზე რეგისტრაციის ვიდეოინსტრუქცია: https://youtu.be/CDW1jNikWQ4?feature=shared

დამატებითი ინფორმაციისთვის შეგიძლიათ მოგვმართოთ ელექტრონულ ფოსტაზე: etwinningplus@tpdc.ge