EURACTIV: რუსეთის წინააღმდეგ ევროკავშირის სანქციები სულ უფრო მეტად ექცევა ეროვნული ინტერესების გავლენის ქვეშ, რადგან წევრი ქვეყნების მთავრობები კრემლის „შავ სიასთან“ დაკავშირებულ მოლაპარაკებებს სრულიად სხვა საკითხებში დათმობების მისაღწევად იყენებენ

რუსეთის წინააღმდეგ ევროკავშირის სანქციები სულ უფრო მეტად ექცევა ეროვნული ინტერესების გავლენის ქვეშ, რადგან წევრი ქვეყნების მთავრობები კრემლის „შავ სიასთან“ დაკავშირებულ მოლაპარაკებებს სრულიად სხვა საკითხებში დათმობების მისაღწევად იყენებენ, - წერს გამოცემა EURACTIV-ი.

გასულ კვირას წევრი ქვეყნების მთავრობებმა მიაღწიეს შეთანხმებას კრემლთან დაახლოებულ პირებზე სანქციების გახანგრძლივების შესახებ, ბლოკის „შავი სიიდან“ ალიშერ უსმანოვისა და მიხაილ ფრიდმანის ამოღების სანაცვლოდ.

ამ ინიციატივამ - საფრანგეთის მეთაურობით, სლოვაკეთისა და ლუქსემბურგის მხარდაჭერითა და ლატვიის მკვეთრი წინააღმდეგობის ფონზე - ევროკავშირის ზოგიერთ დიპლომატში შეშფოთება გამოიწვია. მიზეზი ისაა, რომ სანქციები სულ უფრო ხშირად გამოიყენება ვაჭრობის ინსტრუმენტად იმ წევრი სახელმწიფოების მიერ, რომლებიც საკუთარი საგარეო პოლიტიკის ინტერესების გატარებას ცდილობენ.

მაგალითად, საფრანგეთის მოთხოვნა უკავშირდებოდა აზერბაიჯანში დაპატიმრებული ორი ფრანგის გათავისუფლებას, რომელთაგან ერთ-ერთი შეთანხმების ხელმოწერიდან რამდენიმე საათში შეიწყალეს.

ევროპული პოლიტიკის ცენტრის (European Policy Centre) უფროსი ანალიტიკოსის, ფილიპ ლაუსბერგის განცხადებით, 2022 წლიდან სანქციების ფოკუსმა ენერგეტიკული უსაფრთხოებიდან უფრო კონკრეტულ ეკონომიკურ, კორპორაციულ თუ საგარეო პოლიტიკურ ინტერესებზე გადაინაცვლა.

„ეს უკვე სულ უფრო გავრცელებულ პრაქტიკად ყალიბდება“, - განაცხადა მან და დასძინა, რომ ტენდენცია „ბევრად უფრო ვიწრო ვაჭრობისკენ“ მიდის.

თუკი სანქციების 22-ე პაკეტი დამტკიცდება, ბრიუსელი სრულიად ახალ ეტაპზე გადავა. ლაუსბერგის თქმით, „იოლად მისაღწევი მიზნები“ ძირითადად უკვე მიღწეულია - წინა პაკეტებმა უკვე სრულად მოიცვა ნავთობი, გაზი, ნედლეული, ექსპორტის კონტროლი და ფინანსური სანქციები.

ის, რაც დარჩა, არის ჩრდილოვანი ფლოტის მომსახურე კომპანიები, ფინანსური აქტორები, კრიპტოვალუტის ბირჟები და მესამე ქვეყნების ბიზნესები, რომლებიც რუსეთს ექსპორტის კონტროლისთვის გვერდის ავლაში ეხმარებიან. თუმცა, ასეთი ოპერაციების შეფერხება ბევრად უფრო რთულია.

მიუხედავად იმისა, რომ ევროკავშირმა სანქციების გვერდის ავლის წინააღმდეგ ზომები უკვე მიიღო, Financial Times-ის ახლახან ჩატარებული გამოძიება A7 ჯგუფის შესახებ - რომელმაც სანქციების მიუხედავად რუსეთში დაახლოებით 6.9 მილიარდი დოლარი გადარიცხა - ცხადყოფს, რომ ეს ზომები „ჯერ კიდევ არ მუშაობს ისე კარგად, როგორც საჭიროა“ - აღნიშნავს ლაუსბერგი.