Euronews: ლავროვმა უარყო გერმანელი კოლეგის მოწოდებები „საშიში“ ესკალაციური ნაბიჯების შეჩერების შესახებ და ბერლინი უკრაინის „მთავარ სპონსორად“ მოიხსენია

რუსეთის საგარეო საქმეთა მინისტრმა, სერგეი ლავროვმა უარყო გერმანელი კოლეგის მოწოდებები „საშიში“ ესკალაციური ნაბიჯების შეჩერების შესახებ და ბერლინი უკრაინის „მთავარ სპონსორად“ მოიხსენია.

სერგეი ლავროვი შაბათს, ნიუ-იორკში, გაეროს გენერალური ასამბლეის კულუარებში გერმანიის საგარეო საქმეთა მინისტრს, იოჰან ვადეფულს შეხვდა - ცოტა ხნით ადრე, ვიდრე ლავროვი მსოფლიო ლიდერების წინაშე სიტყვით გამოვიდოდა.

შეხვედრისას, გერმანელმა მინისტრმა მოსკოვს მოუწოდა, უარი თქვას ევროპისკენ მიმართულ „ესკალაციის საშიშ გზაზე“. ამასთან, მან აღნიშნა, რომ ბერლინი მზადაა რუსეთთან ურთიერთობების გაუმჯობესებისთვის - იმ პირობით, თუ კრემლი დაამტკიცებს, რომ ნამდვილად სურს უკრაინაში ომის დასრულება, იუწყება Associated Press-ი გერმანული დელეგაციის წარმომადგენელზე დაყრდნობით.

გაეროს გენერალურ ასამბლეაზე გამოსვლისას ლავროვმა დამსწრე საზოგადოებას მიმართა: „კანცლერი მერცი აცხადებს, რომ გერმანია კვლავ უნდა გახდეს წამყვანი სამხედრო ძალა ევროპაში. ესმით ბერლინში, სად მიიყვანს ეს? ნუთუ მათ ვერ ისწავლეს მეორე მსოფლიო ომის გაკვეთილები?“

გამოსვლის შემდეგ გამართულ პრესკონფერენციაზე რუს დიპლომატს რუსეთ-გერმანიის ურთიერთობების შესახებაც ჰკითხეს.

„ამ საგარეო საქმეთა მინისტრის ინიციატივიდან ახალი არაფერი გამოსულა“, - განუცხადა მან ჟურნალისტებს.

„მან უბრალოდ გაამეორა თავისი ოფიციალური საჯარო პოზიცია, რომელიც რუსეთს გმობს. თავად განსაჯეთ, ითვლება თუ არა ეს დიალოგად?“ - დასძინა ლავროვმა.