Euronews: მადიარი ფონ დერ ლაიენს წერილს გაუგზავნის, რომელშიც ჩამოაყალიბებს თავისი მთავრობის პოზიციას ევროკავშირის დაფინანსებასთან დაკავშირებულ პოლიტიკურად რთულ პირობებზე
უნგრეთის პრემიერ-მინისტრი, პეტერ მადიარი ხუთშაბათს ევროკომისიის პრეზიდენტს, ურსულა ფონ დერ ლაიენს წერილს გაუგზავნის, რომელშიც ჩამოაყალიბებს თავისი მთავრობის პოზიციას ევროკავშირის დაფინანსებასთან დაკავშირებულ პოლიტიკურად რთულ პირობებზე. ინფორმაციას ამის შესახებ Euronews-ი ავრცელებს.
მადიარი დაჰპირდა ამომრჩეველს, რომ დაიბრუნებდა ევროკავშირის 17 მილიარდი ევროს ოდენობის დაფინანსებას, რომელიც მისი წინამორბედის, ვიქტორ ორბანის დროს დაიბლოკა.
აღნიშნული თანხიდან 10 მილიარდ ევროს, რომელიც ევროკავშირის „აღდგენისა და მდგრადობის მექანიზმით“ არის გათვალისწინებული, აგვისტოს ბოლოს ვადის ამოწურვა ემუქრება, თუ ახალი მთავრობა მის ათვისებას ვერ შეძლებს.
„ყველაზე მნიშვნელოვანია საპროექტო საკითხები, როგორიცაა უნგრეთის განვითარების ბანკის რეკაპიტალიზაცია, სპეციალური საპროექტო კომპანიის შექმნა და ის, თუ როგორ შევძლებთ ტრანსპორტის, რკინიგზისა და სარკინიგზო ინვესტიციების იმგვარად სტრუქტურირებას, რომ ისინი მისაღები გახდეს“, - განაცხადა მადიარმა.
უნგრეთი ამჟამად განიხილავს წინა მთავრობის მიერ შემუშავებულ ეროვნული განვითარების პროგრამას და მას ევროკომისიას მაისის ბოლომდე წარუდგენს.
მადიარმა აღიარა, რომ დაფინანსების მისაღებად ევროკავშირის მიერ წაყენებული რამდენიმე პირობა მისი მთავრობისთვის პოლიტიკურად სენსიტიურია და მიანიშნა, რომ იგი ყველა მათგანის შესრულებას არ აპირებს.
„ევროკომისიის მოლოდინია, მაგალითად, რომ მთავრობამ ეტაპობრივად გააუქმოს ზოგიერთი სპეციალური გადასახადი. ეს, ცხადია, უნგრეთის ეკონომიკის ინტერესებშიც შედის, მაგრამ არსებული საბიუჯეტო ვითარების გათვალისწინებით, უნგრეთის მთავრობა ამ ვალდებულებას ნამდვილად ვერ აიღებს“, - განაცხადა მადიარმა.
„ხვალ კომისიის პრეზიდენტს, ურსულა ფონ დერ ლაიენს დეტალურ წერილს გავუგზავნი, სადაც აღვწერ, თუ სად შეგვიძლია გამოვიჩინოთ გარკვეული მოქნილობა - იქ, სადაც ეს მისაღები იქნება უნგრეთის ეკონომიკისა და უნგრელი ხალხის ინტერესებიდან გამომდინარე - და სად არა. მე ეს უკვე ვიცი, თუმცა შეთანხმებას აუცილებლად მივაღწევთ“, - აღნიშნა მადიარმა.
