Euronews: ფრიდრიხ მერცი მზარდი ზეწოლის ქვეშ მოექცა მას შემდეგ, რაც რეგიონულ არჩევნებში ულტრამემარჯვენე და ულტრამემარცხენე პარტიებთან მტკივნეული მარცხი განიცადა

გერმანიის კანცლერი ფრიდრიხ მერცი ორშაბათს მზარდი ზეწოლის ქვეშ მოექცა მას შემდეგ, რაც რეგიონულ არჩევნებში ულტრამემარჯვენე და ულტრამემარცხენე პარტიებთან მტკივნეული მარცხი განიცადა - პარტია AfD-ში პროგნოზირებენ, რომ ის თანამდებობას უახლოეს თვეებში დატოვებს, - წერს Euronews-ი.

პარტია „ალტერნატივა გერმანიისთვის“ (AfD) კვირას პირველ ადგილზე გავიდა ჩრდილო-აღმოსავლეთში მდებარე მეკლენბურგ-წინა პომერანიის მხარეში, სადაც მერცის „ქრისტიან-დემოკრატიულმა კავშირმა“ (CDU) ხმათა მხოლოდ 4.9% მიიღო, ვერ გადალახა საარჩევნო ბარიერი და 1945 წლიდან - პარტიის დაარსების დღიდან - ყველაზე დაბალი მაჩვენებელი დააფიქსირა.

ბერლინში პირველ ადგილზე ულტრამემარცხენე პარტია Die Linke („მემარცხენეები“) გავიდა. მისი კანდიდატი ახლა გერმანიის დედაქალაქის მერის პოსტის დაკავებისკენ მიისწრაფვის, სადაც AfD-მაც სერიოზულ წარმატებას მიაღწია.

აღნიშნული წარუმატებლობა დაემთხვა პერიოდს, როდესაც ფრიდრიხ მერცის პოლიტიკურ პერსპექტივებთან დაკავშირებით დისკუსია განსაკუთრებით გამწვავდა.

ამას წინ უძღოდა 6 სექტემბერს საქსონია-ანჰალტის ფედერალურ მხარეში გამართული არჩევნები, სადაც AfD-მ, რომელიც თვეების განმავლობაში ლიდერობს სრულიად გერმანიის მასშტაბით ჩატარებულ კვლევებში, ისტორიულად საუკეთესო შედეგი დააფიქსირა.

მეკლენბურგ-წინა პომერანიის მხარეში AfD-ის მთავარმა კანდიდატმა, ლაიფ-ერიკ ჰოლმმა ეჭვი გამოთქვა, რომ ფრიდრიხ მერცი თანამდებობაზე დიდხანს დარჩენას შეძლებს. ჰოლმის თქმით, კანცლერის რეიტინგი, პოსტის დაკავებიდან 16 თვის თავზე, მკვეთრად შემცირებულია.

მერცმა აღიარა, რომ მისმა „ქრისტიან-დემოკრატიულმა კავშირმა“ მეკლენბურგ-წინა პომერანიაში „კატასტროფა“ განიცადა, თუმცა პირობა დადო, რომ არჩეულ კურსს არ გადაუხვევს, რეფორმებს გააგრძელებს და ქვეყანას „სიმტკიცითა და მოთმინებით“ მართავს.