ეუთოს საპარლამენტო ასამბლეაზე აშშ-ის დელეგაციის ხელმძღვანელმა ჯო უილსონს სამშობლოში დაბრუნებაზე უარი უთხრა
ეუთოს საპარლამენტო ასამბლეის ფარგლებში აშშ-ის დელეგაციის ორ „რესპუბლიკელ“ წევრს როჯერ უიკერსა და ჯო უილსონს შორის უთანხმოება დაპირისპირებაში გადაიზარდა. ინფორმაციას ამეირკული მედია ავრცელებს.
სენატორმა უიკერმა კონგრესმენ უილსონს შეატყობინა, რომ ის აღარ იყო მისი დელეგაციის წევრი და ვაშინგტონში დასაბრუნებლად „სხვა გზა თავად უნდა მოეძებნა“.
მედიის ცნობით, კონფლიქტი მას შემდეგ გამწვავდა, რაც უიკერმა უარი თქვა უილსონის ინიციატივის მხარდაჭერაზე, რომელიც 2027 წელს ეუთოს საპარლამენტო ასამბლეის ჩარლსტონში ჩატარებას ითვალისწინებდა.
როგორც მედია წერს, ორ პოლიტიკოსს მჭიდრო თანამშრომლობა ჰელსინკის კომისიაშიც აკავშირებთ. კომისიას, რომელიც ეუთოს წევრ ქვეყნებში ადამიანის უფლებების მდგომარეობას აკვირდება, უილსონი ხელმძღვანელობს, ხოლო უიკერი მისი მოადგილეა.
სამხრეთ კაროლინის წარმომადგენელი ჯო უილსონი გეგმავდა ნიდერლანდებში მიმდინარე წლევანდელ სესიაზე კონგრესის სხვა დელეგატებზე ერთი დღით გვიან ჩასულიყო, რათა 4 ივლისი საკუთარ საარჩევნო ოლქში აღენიშნა. მისი თქმით, სატელეფონო საუბრის დასრულების შემდეგ ფიქრობდა, რომ საკითხზე უიკერთან განხილვას გააგრძელებდა.
თუმცა, ვიდრე უილსონის თვითმფრინავი დაეშვებოდა, უიკერმა უკვე განაცხადა, რომ აშშ 2027 წლის სესიას აღარ უმასპინძლებდა.
ამის საპასუხოდ უილსონმა სოციალურ ქსელ X-ში დაწერა, რომ ჩარლსტონში სესიის გამართვისთვის „მზადება აქტიურად მიმდინარეობს და ფართო მხარდაჭერით სარგებლობს“, მიუხედავად იმისა, რასაც მან „ბოროტი ჭორი“ უწოდა. პოსტს თან დაურთო აშშ-ის პრეზიდენტ დონალდ ტრამპთან გადაღებული ფოტოც.
მედიის მიერ მოპოვებული მოკლეტექსტური შეტყობინებების მიხედვით, უიკერმა უილსონს მისწერა: „ეს საკითხი დასრულებულია და შენი საპირისპირო განცხადებები ამას ვერ შეცვლის. დროა, საკუთარი თავი და ამერიკული დელეგაცია აღარ შეარცხვინო“.
