უკრაინული მედია: ევროკავშირის ელჩები პუტინისა და იანუკოვიჩის წინააღმდეგ სანქციების გაგრძელებაზე კვლავ ვერ შეთანხმდნენ და ახალ შეხვედრას გეგმავენ

ევროკავშირის წევრი ქვეყნების მუდმივ წარმომადგენელთა კომიტეტი ორშაბათს დილით ევროკავშირის ინდივიდუალური სანქციების გაგრძელებაზე ვერ შეთანხმდა. საუბარია სანქციებზე რუსეთის პრეზიდენტ ვლადიმირ პუტინის, საგარეო საქმეთა მინისტრ სერგეი ლავროვისა და რუსეთში გაქცეული უკრაინის ექს-პრეზიდენტ ვიქტორ იანუკოვიჩის წინააღმდეგ.

ინფორმაციას „Європейська правда“ ევროკავშირის რამდენიმე დიპლომატზე დაყრდნობით ავრცელებს.

როგორც აღინიშნება, უკრაინის ტერიტორიული მთლიანობის დარღვევის გამო დაწესებული ინდივიდუალური სანქციების გაგრძელების განხილვა ნაშუადღევს გაგრძელდება. მოქმედი სანქციების რეჟიმი, რომლის სიის ფორმირებაც ევროკავშირმა ჯერ კიდევ 2014 წელს დაიწყო, მოიცავს ფიზიკურ და იურიდიულ პირებს, რომლებიც პასუხისმგებელნი არიან უკრაინის ტერიტორიული მთლიანობის, სუვერენიტეტისა და დამოუკიდებლობის შელახვასა თუ მუქარაზე.

14 სექტემბერს ევროკავშირმა უკრაინის ტერიტორიული მთლიანობისა და სუვერენიტეტის დარღვევასთან დაკავშირებული სანქციების რეჟიმი 7 დღით გააგრძელა, რადგან სლოვაკეთი და საფრანგეთი სიიდან ორი რუსი ოლიგარქის ამოღებას კვლავ ითხოვენ.

„Європейська правда“-ს წყაროებმა აცნობეს, რომ პარიზს უსმანოვისთვის სანქციების მოხსნა აზერბაიჯანის ციხეებში მყოფი თავისი რამდენიმე მოქალაქის გათავისუფლების სანაცვლოდ სურს.