ევროპის საბჭოს საპარლამენტო ასამბლეის წარმომადგენელი: არსებობს გარკვეული კანონები, რომლებიც გარკვეულწილად აფერხებენ დემოკრატიულ პროცესებს საქართველოში. ჩემთვის ყოველთვის მიუღებელია, როდესაც ოპოზიცია ციხეშია მხოლოდ იმიტომ, რომ ის ოპოზიციაა

ევროპის საბჭოს საპარლამენტო ასამბლეის რეზოლუციას აფასებენ ასამბლეის წარმომადგენლები.

მათი ნაწილი ქართული კანონების გაუქმებას და დაპატიმრებული ოპოზიციონერების გათავისუფლებას ითხოვს, ნაწილისთვის კი ეს მოთხოვნა ქვეყნის შიდა საქმეებში ჩარევაა.

„მოხსენება ძალიან შემაშფოთებელია და ყველა ინფორმაცია იმის შესახებ თუ როგორ ექცევიან ოპოზიციის წევრებს, მათ ბრალს სდებენ. მსგავსი კანონები ბევრ სხვა ქვეყანაშიც არსებობს. რეალური პრობლემა ჩნდება მის პრაქტიკულ გამოყენებაში ხელისუფლების, პროკურატურის და სასამართლოების მხრიდან“, - განაცხადა „ქრონიკასთან“ ევროპის საბჭოს საპარლამენტის ასამბლეის წარმომადგენელმა პაველ ჯაბლონსკიმ.

ევროპის საბჭოს საპარლამენტო ასამბლეის წარმომადგენელი პაულ გალისი კი აცხადებს, რპომ გარკვეული კანონები, რომელიც საქართველოში მოქმედებს აფერხებს დემოკრატიულ პროცესს.

„არსებობს გარკვეული კანონები, რომლებიც გარკვეულწილად აფერხებენ დემოკრატიულ პროცესებს საქართველოში. ჩემთვის ყოველთვის მიუღებელია, როდესაც ოპოზიცია ციხეშია მხოლოდ იმიტომ, რომ ის ოპოზიციაა“, - აღნიშნა „ქრონიკასთან“ ევროპის საბჭოს საპარლამენტო ასამბლეის წარმომადგენელმა პაულ გალისიმ.

ოპოზიციონერი პოლიტიკოსების, მათ შორის მიხეილ სააკაშვილის გათავისუფლება და უცხოური ფინანსების გამჭვირვალობის მიზნით მიღებული კანონის გაუქმება - კარგად ნაცნობი მოთხოვნები, ამჯერად ევროსაბჭოს საპარლამენტო ასამბლეის რეზოლუციაში ჩაიწერა. დებატებს ესწრებოდნენ ოპოზიციონერი პოლიტიკოსები და „ენჯეოს“ წარმომადგენლები.