ევროპისა და აფრიკის წყალსათხილამურო სპორტის ღია ჩემპიონატი საზეიმოდ დაიხურა

ქალაქ ფოთში, მალთაყვის ტერიტორიაზე მდებარე ოქროს ტბის წყალსათხილამურო ბაზაზე, წყალსათხილამურო სპორტის ევროპისა და აფრიკის ღია ჩემპიონატი დასრულდა. ტურნირის დასკვნით დღეს ფინალური ასპარეზობები სლალომსა და ფიგურებში გაიმართა.

ტურნირის დახურვის ოფიციალურ ცერემონიაზე საქართველოს სპორტის მინისტრის პირველმა მოადგილე ირაკლი მეძმარიაშვილმა ჩემპიონატის პრიზიორი სპორტსმენები დააჯილდოვა. გამარჯვებული და პრიზიორები სამ დისციპლინაში - სლალომში, ფიგურებსა და ტრამპლინიდან ხტომაში - გამოვლინდნენ. დახურვის ცერემონიაზე მაყურებლების წინაშე წარდგა „ქართული ნაციონალური ბალეტი - სუხიშვილები”.

სამი დღის განმავლობაში ჩემპიონატში 20 ქვეყნის 120-ამდე სპორტსმენმა მიიღო მონაწილეობა. საქართველოს ღირსებას სამი ფოთელი სპორტსმენი - გენადი გურალია, ცოტნე ბერაია და გიორგი შონია - იცავდა.

ტურნირი საქართველოს სპორტის სამინისტროსა და ფოთის მუნიციპალიტეტის მერიის მხარდაჭერით ჩატარდა, ორგანიზატორები იყვნენ საქართველოს წყალსათხილამურო სპორტის ეროვნული ფედერაცია და ფოთის ტბის კლუბი. ღონისძიება საერთაშორისო ფედერაციის (IWWF) პატრონაჟით მიმდინარეობდა.

ფოთს წყალსათხილამურო სპორტთან განსაკუთრებული ისტორიული კავშირი აქვს: 1991 წელს სწორედ აქ გაიმართა საქართველოში პირველი ევროპის ჩემპიონატი ამ სპორტის სახეობაში და წელს ამ ისტორიული მოვლენის საიუბილეო - 35-ე წელი აღინიშნება.