Financial Times: ბელგიის საგარეო საქმეთა სამინისტრო ტრამპის ამერიკას მოკავშირედ აღარ განიხილავს

ბელგიის საგარეო საქმეთა სამინისტრომ შიდა დოკუმენტში გააფრთხილა, რომ დონალდ ტრამპის პრეზიდენტობის პირობებში აშშ უკვე აღარ არის ისეთი სანდო მოკავშირე, როგორიც წარსულში იყო. ინფორმაციას Financial Times-ი ავრცელებს.

შიდა დოკუმენტის თანახმად, რომელიც გამოცემას ხელში ჩაუვარდა, ბელგიის საგარეო საქმეთა სამინისტრო უწყების თანამშრომლებს მოუწოდებს, ბრიუსელის ინტერესების დასაცავად ტრამპის მოწინააღმდეგეებთან ურთიერთობები გააძლიერონ.

ევროპაში აშშ-ის პრეზიდენტის მიერ რეგიონის ტრადიციული მოკავშირეების მიმართ პოზიციის გამო შეშფოთების ფონზე, ბელგიის საგარეო საქმეთა სამინისტრომ ვაშინგტონთან ურთიერთობის გადახედვის სტრატეგია შეიმუშავა. მიზანია, ბელგიამ საკუთარი ინტერესები დაიცვას ისე, რომ აშშ-ის მიმართ „მტრულად განწყობილი“ პარტნიორის შთაბეჭდილება არ შექმნას, წერს გამოცემა.

„ახლა უკვე ცხადია, რომ ამერიკელი პარტნიორი აღარ არის ის მოკავშირე, როგორიც წარსულში იყო“, - ნათქვამია საგარეო საქმეთა სამინისტროს ამერიკისა და კარიბის ზღვის ქვეყნების მიმართულების მიერ 2025 წლის ბოლოს მომზადებულ სტრატეგიულ დოკუმენტში, რომელიც Financial Times-მა ნახა.

დოკუმენტი ევროკავშირსა და ბელგიას აშშ-თან ურთიერთობების „საფუძვლიან გადაფასებას“ ითხოვს და აღნიშნავს, რომ „აშშ-ში ამჟამად მიმდინარე პროცესებმა შესაძლოა ბელგიისა და ევროკავშირის რამდენიმე სასიცოცხლოდ მნიშვნელოვანი ინტერესი დააზიანოს“.

ტრამპის მეორე საპრეზიდენტო ვადის განმავლობაში აშშ-მა ევროკავშირთან სავაჭრო ომი დაიწყო, ტრამპმა ბლოკის ტერიტორიის ნაწილის ოკუპაციის შესაძლებლობაც ახსენა და ულტრამემარჯვენე პარტიებს დაუჭირა მხარი, ევროპას კი „ცივილიზაციის გაქრობით“ დაემუქრა. ამ ყველაფერმა ტრანსატლანტიკური ურთიერთობების დაძაბულობა გააღრმავა, წერს გამოცემა.

ევროპელი ლიდერების დიდი ნაწილი საჯაროდ კვლავ უსვამს ხაზს ვაშინგტონთან ალიანსის მნიშვნელობას, რადგან ევროპა თავდაცვისა და ვაჭრობის სფეროებში მნიშვნელოვნად არის დამოკიდებული აშშ-ზე. თუმცა, გამოცემის ცნობით, დახურულ კარს მიღმა ევროპელი ოფიციალური პირები ურთიერთობებში არსებულ დაძაბულობას განიხილავენ.

ბელგიის დოკუმენტში ნათქვამია, რომ „აშშ-ის მოქმედ ადმინისტრაციასთან ურთიერთობა კვლავ აუცილებელია“, თუმცა ფედერალური მთავრობის ქვედა დონეებთან თანამშრომლობა „მნიშვნელოვნად უნდა გაძლიერდეს“. მათ შორის საუბარია როგორც „რესპუბლიკელ“, ისე „დემოკრატ“ გუბერნატორებსა და დიდი ქალაქების მერებზე.

დოკუმენტი ასევე რეკომენდაციას უწევს „დემოკრატიულ“ ოპოზიციასთან კონტაქტების შენარჩუნებას, კონგრესთან თანამშრომლობასა და „ორპარტიული პოლიტიკური ელიტების ახალი თაობების გამოვლენას, რომლებსაც მომავალ ამერიკაში მნიშვნელოვანი როლის შესრულება შეუძლიათ“.

2025 წლის 27 ოქტომბრით დათარიღებულ დოკუმენტში, რომელიც ბარტ დე ვევერის მთავრობის ხელისუფლებაში მოსვლიდან დაახლოებით რვა თვის შემდეგ მომზადდა, ასევე ნათქვამია: „არ უნდა შევაფასოთ სათანადოდ ის პატივისცემა, რომელსაც პრეზიდენტი ტრამპი სამეფო ოჯახების მიმართ გამოხატავს“.

დოკუმენტის მომზადების შემდეგ ბელგიის მეფე ფილიპე ივლისში აშშ-ში გაემგზავრა ფეხბურთის მსოფლიო ჩემპიონატზე დასასწრებად, ხოლო დედოფალი მატილდა მიმდინარე კვირას ბელგიის რამდენიმე მინისტრს ნიუ-იორკში, გაეროს გენერალური ასამბლეის ფარგლებში, ახლდა.

დოკუმენტი აშშ-თან ურთიერთობის საკითხზე „სტრატეგიასა და მის პრაქტიკულ განხორციელებას“ განსაზღვრავს და აღწერს ტრამპის ადმინისტრაციასთან თანამშრომლობის სხვადასხვა რისკს. ამასთან, დოკუმენტი თანამშრომლობისთვის საერთო ინტერესების სფეროებზე, მათ შორის ნარკოტრაფიკთან ბრძოლაზე, კონცენტრირებას სთავაზობს.

„ჩვენს ფედერალურ და რეგიონულ მინისტრებს მოუწევთ საკუთარი ვიზიტებისა და მოქმედებების მასშტაბის დაკალიბრება, ამ ვიზიტებთან დაკავშირებული შესაძლებლობებისა და რისკების გათვალისწინებით“, - ნათქვამია ბელგიის საგარეო საქმეთა სამინისტროს დოკუმენტში.