Financial Times: ვლადიმერ პუტინმა და ვოლოდიმირ ზელენსკიმ აშშ-ის შუამავლობით მიმდინარე სამშვიდობო მოლაპარაკებების მიმართ ინტერესი დაკარგეს

რუსეთსა და უკრაინაში ფიქრობენ, რომ აშშ-ის შუამავლობით სამშვიდობო მოლაპარაკებების აღდგენის პერსპექტივა, ახლო აღმოსავლეთში ომის დასრულების შემთხვევაშიც კი, მცირეა. ინფორმაციას Financial Times-ი საკუთარ წყაროებზე დაყრდნობით ავრცელებს.

გამოცემის ცნობით, ვლადიმერ პუტინმა უკრაინის დიდი ტერიტორიის ძალით დაპყრობაზე გადაიტანა ყურადღება და მზად არის უფრო მეტი მოთხოვნა წაუყენოს კიევს მას შემდეგ, რაც დონბასის საკვანძო რეგიონს ხელში ჩაიგდებს.

ამასთან, კიევის ოფიციალური პირები მიიჩნევენ, რომ მას შემდეგ, რაც ფრონტის ხაზზე რუსეთის წინსვლა შეაჩერეს და უპილოტო საფრენი აპარატებით რუსულ ინფრასტრუქტურას დიდი ზიანი მიაყენეს, აშშ უკრაინულ მხარეზე ისეთ ძლიერ ზეწოლას აღარ განახორციელებს.

მიუხედავად იმისა, რომ აშშ-ის პრეზიდენტმა დონალდ ტრამპმა გასულ კვირას განაცხადა, რომ „ჩვენ სულ უფრო ვუახლოვდებით“ გარიგებას, არცერთი მხარე მოლაპარაკებების გაგრძელებას დიდ მნიშვნელობას არ ანიჭებს. ამერიკელი ჩინოვნიკები უარყოფენ ინფორმაციას, რომ ოდესმე უკრაინაზე ზეწოლას ახდენდნენ, - წერს Financial Times-ი.

უკრაინული მხარე უკვე თებერვალში ფიქრობდა, რომ რუსეთთან მოლაპარაკებები ჩიხშია შესული და იმედგაცრუებული იყო იმით, რომ ვაშინგტონმა პუტინზე ზეწოლა ვერ მოახდინა, რათა მას საკუთარი მოთხოვნები შეერბილებინა.

„ამერიკულმა მხარემ რუსეთთან მოლაპარაკებების დროს ვერანაირ პროგრესს ვერ მიაღწია“, - განუცხადა გამოცემას ერთ-ერთმა უკრაინელმა ჩინოვნიკმა. „ყველაფერი, რის განხილვაც შეიძლებოდა, უკვე განხილულია“, - აღნიშნა მან.