გარემოს დაცვისა და ბუნებრივი რესურსების კომიტეტმა „ნარჩენების მართვის კოდექსში“ ცვლილებებს პირველი მოსმენით მხარი დაუჭირა
გარემოს დაცვისა და ბუნებრივი რესურსების კომიტეტმა პირველი მოსმენით, დაჩქარებული წესით განიხილა და მხარი დაუჭირა „ნარჩენების მართვის კოდექსში ცვლილების შეტანის შესახებ“ კანონპროექტს.
საკითხი განსახილველად გარემოს დაცვისა და სოფლის მეურნეობის მინისტრის მოადგილემ ზურაბ ეზუგბაიამ წარადგინა.
მომხსენებლის განმარტებით, ნარჩენების მართვის კოდექსი დღეის მდგომარეობით ითვალისწინებს ნარჩენების დროებითი შენახვის ობიექტზე – ნარჩენების 3 წელზე ნაკლები დროით შენახვას, თუ ნარჩენები განკუთვნილია აღდგენისთვის, ან 1 წელზე ნაკლები დროით შენახვას, თუ ნარჩენები განკუთვნილია განთავსებისთვის. საკანონმდებლო ცვლილების თანახმად, დასაშვები ხდება სახიფათო ნარჩენების დროებითი შენახვის ვადის ერთჯერადად, არაუმეტეს ერთი წლით გაგრძელება, გარემოს დაცვისა და სოფლის მეურნეობის სამინისტროს სისტემაში მოქმედი სსიპ „გარემოს ეროვნული სააგენტოს“ მიერ, ხოლო უფრო ხანგრძლივი ვადით გაგრძელება - მთავრობის დადგენილებით. მინისტრის მოადგილის განცხადებით, საკანონმდებლო ცვლილებით ასევე გათვალისწინებულია ნაჩვენების მართვის ეროვნული სტრატეგიის მიღების ვადების ჰარმონიზაცია საქართველოს მთავრობის დადგენილებით განსაზღვრული პოლიტიკის დოკუმენტების მიღების ვადებთან.
კანონპროექტი ასევე ითვალისწინებს ცვლილებებს, რომლებიც შეეხება ნარჩენების მართვის კოდექსში ასახულ ადმინისტრაციულ სამართალდარღვევებზე სანქციების გამკაცრებას.
კომიტეტის წევრებმა, გარკვეული შენიშვნების გათვალისწინებით, წარმოდგენილ ცვლილებებს მხარი დაუჭირეს.
