გიორგი გაბუნია: ჩვენ კარგად ვიცით რასა იუკნევიჩიენეს როლი საქართველოს მიმართ, კარგად გვახსოვს ეს ადამიანი ჩამობრძანებული საქართველოში, სადაც პირდაპირ იღებდა მონაწილეობას იმ ძალადობრივ აქციებში, რომელიც იმართებოდა პარლამენტის წინ
ეს არის 2025 წლის ევროკომისიის ანგარიშის საფუძველზე შექმნილი 16 თებერვლის რეზოლუცია, რომელიც ევროპარლამენტის საგარეო კომიტეტმა განიხილა და ივნისის თვეში წარედგინება პლენარულ სხდომას განსახილველად, სადაც კენჭი ეყრება აღნიშნულ გადაწყვეტილებას, - განაცხადა გადაცემაში „დღის ქრონიკა“ პარლამენტის კულტურის კომიტეტის თავმჯდომარემ და საზოგადოება „ქართულის“ ლიდერმა გიორგი გაბუნიამ რასა უკნევიჩიენეს მიერ წარდგენილ რეზოლუციაზე საუბრისას.
„ჩვენ ძალიან კარგად ვიცით რასა იუკნევიჩიენეს როლი და დამოკიდებულება საქართველოს მიმართ, ჩვენ კარგად გვახსოვს ეს ადამიანი ჩამობრძანებული საქართველოში, სადაც პირდაპირ იღებდა მონაწილეობას იმ ძალადობრივ აქციებში, რომელიც იმართებოდა საქართველოს პარლამენტის წინ. ადამიანი, რომელიც არაერთი მტრული და არამეგობრული განცხადებებით არის ცნობილი საქართველოს მიმართ. ეს ადამიანი პირდაპირ იყო „ნაციონალური მოძრაობის“ მესიჯბოქსზე დამჯდარი, როგორც სხვა რადიკალური ძალის წარმომადგენლები.
ყველაზე ნიშანდობლივი არის განცხადებები და აგრესია ქართული მედიის წინააღმდეგ, თავისუფალი სიტყვის წინააღმდეგ, რომ გაჟღერდა ინიციატივა ქართული ტელევიზიების „იმედის“, „პოს ტივის“ და „რუსთავი 2“-ის დასანქცირებაზე. ეს არის უკიდურესად აღმაშფოთებელი ფაქტი და ნათლად ადასტურებს ამ ადამიანების ზრახვებს.
მე მინდა სრული სოლიდარობა გამოვთქვა ჩვენი ტელევიზიების მიმართ და კიდევ ერთხელ ხაზი გავუსვა იმას, რომ ეს კიდევ ერთი ნათელი დასტურია იმისა, რომ ტელევიზიები, რომელთა მიმართაც ხორციელდება ეს პოლიტიკური აგრესია, კიდევ ერთი ნათელი დასტურია იმისა, რომ თქვენ დაუპირისპირდით იმ საშინელ დეზინფორმაციულ კამპანიას, რომელიც წარმოებდა საქართველოში, მიზნად ისახავდა ჩვენი საზოგადოების დამძიმებას.
სწორედ ამ დეზინფორმაციის კამპანიას დაუპირისპირდნენ ეს ტელევიზიები და სწორედ თქვენი მეშვეობით ვახერხებთ იმას, რომ საზოგადოებას დავანახოთ რეალობა“, - აღნიშნა გიორგი გაბუნიამ.
