გიორგი კაკაურიძე: საგარეო სექტორის მიმართულებით პირველი სამი თვის განმავლობაში საქონლით საგარეო სავაჭრო ბრუნვა 5 867.0 მლნ აშშ დოლარი იყო. აქედან, ექსპორტი 1 723.7 მლნ აშშ დოლარია, რაც 23.4%-ით მეტია წინა წლის შესაბამის მაჩვენებელზე

საფინანსო-საბიუჯეტო კომიტეტმა ფინანსთა სამინისტროს მიერ წარმოდგენილი საქართველოს 2026 წლის სახელმწიფო ბიუჯეტის შესრულების 3 თვის მიმოხილვა მოისმინა. მომხსენებელმა, ფინანსთა მინისტრის პირველმა მოადგილემ გიორგი კაკაურიძემ ძირითად ეკონომიკურ პარამეტრებზე საუბრისას აღნიშნა, რომ 2026 წლის ბიუჯეტი 5%-იანი ეკონომიკური ზრდის პროგნოზით იყო დაგეგმილი, თუმცა, წლის პირველ კვარტალში უფრო მაღალი ეკონომიკური აქტივობა იყო. კერძოდ, იანვარში რეალური ეკონომიკური ზრდა 7,9% იყო, თებერვალში - 8.8 %, ხოლო მარტში - 10.7%. საბოლოო ჯამში კი, I კვარტალში საშუალო ეკონომიკური ზრდის მაჩვენებელი 9.1% იყო. მისივე თქმით, ინფლაციის მაჩვენებელი მარტში 4.3% იყო, ხოლო საშუალო ინფლაცია ბოლო თორმეტი თვის განმავლობაში - 4,4%-ია. გიორგი კაკაურიძის განცხადებით, საგარეო სექტორის მიმართულებით, წელს, პირველი სამი თვის განმავლობაში საქონლით საგარეო სავაჭრო ბრუნვა 5 867.0 მლნ აშშ დოლარი იყო. აქედან, ექსპორტი 1 723.7 მლნ აშშ დოლარია, რაც 23.4%-ით მეტია წინა წლის შესაბამის მაჩვენებელზე, ხოლო იმპორტი - 4 143.2 მლნ აშშ დოლარია, რაც 7.1 პროცენტით ნაკლებია. გიორგი კაკაურიძის განცხადებით, 2026 წლის პირველ კვარტალში, საქართველოს 1 170.4 ათასი საერთაშორისო ვიზიტორი ეწვია, საიდანაც უშუალოდ ტურისტული ვიზიტორების რაოდენობა 997.5 ათასი იყო, რაც გასული წლის ანალოგიურ მონაცემზე დაახლოებით 4.0%-ით მეტია. როგორც მომხსენებელმა აღნიშნა, 2026 წლის პირველ კვარტალში, ტურიზმიდან მიღებულმა შემოსავლებმა 829.8 მლნ აშშ დოლარი შეადგინა, რაც 0.5%-ით მეტია გასული წლის მაჩვენებელზე. მისივე თქმით, 2026 წლის პირველ კვარტალში წმინდა ფულადი გზავნილები წინა წლის შესაბამის პერიოდთან შედარებით 14.4%-ით გაიზარდა და 797.7 მლნ აშშ დოლარი შეადგინა. ნაერთ ბიუჯეტზე საუბარისას, გიორგი კაკაურიძემ აღნიშნა, რომ შემოსავლები გადაჭარბებით შესრულდა და ის 6 942 195.8 ათას ლარს შეადგენს, რაც დაგეგმილი მაჩვენებლის 102.6%-ია. მისივე თქმით, სახელმწიფო ბიუჯეტის კუთხითაც შემოსავლები გადაჭარბებით შესრულდა და ის 5 982 895.2 ათას ლარს შეადგენს, რაც დაგეგმილი მაჩვენებლის 101.6%-ია. ასევე, გადასახადების შესრულების კუთხით, მობილიზებულია 5 593 554.7 ათასი ლარი, ანუ საპროგნოზო მაჩვენებლის 100.5%. სახელმწიფო ბიუჯეტის შესრულების 3 თვის მიმოხილვის თანახმად, საქართველოს 2026 წლის სახელმწიფო ბიუჯეტის შესახებ კანონით სახელმწიფო ბიუჯეტის გადასახდელები განსაზღვრულია 30 881 358.0 ათასი ლარით. აღნიშნული სახსრებიდან საანგარიშო პერიოდში გამოყოფილმა დაზუსტებულმა ასიგნებებმა 7 903 217.5 ათასი ლარი შეადგინა, ხოლო საკასო შესრულებამ - 7 238 179.8 ათასი ლარი. საკასო შესრულება კვარტლის გეგმური მაჩვენებლის 91.6%, ხოლო წლიური დამტკიცებული ბიუჯეტის - 23.4%-ია. 2026 წლის სახელმწიფო ბიუჯეტის შესრულების 3 თვის მიმოხილვის წარდგენის შემდეგ, ფინანსთა მინისტრის პირველმა მოადგილემ კომიტეტის წევრების შეკითხვებს უპასუხა.

ინფორმაციას პარლამენტის პრესსამსახური ავრცელებს.