გიორგი კახიანი რუსული ნავთობისგან წარმოებული პროდუქტების იმპორტთან დაკავშირებით ბრიტანეთის გადაწყვეტილებაზე: ეს მიუთითებს იმაზე, რომ ისინი გამოვიდნენ საკუთარი მოსახლეობის ინტერესებიდან

ეს მიუთითებს იმაზე, რომ ისინი გამოვიდნენ საკუთარი მოსახლეობის ინტერესებიდან გამომდინარე, მაგრამ ანალოგიურ შემთხვევაში, როდესაც ჩვენ ვამბობდით, რომ ყოველთვის მივუერთდებით საერთაშორისო სანქციებს, მაგრამ არ ვაწესებთ ორმხრივ სანქციებს რუსეთთან მიმართებაში, ჩვენ ამაზე გვაკრიტიკებდნენ და რას არ გვეძახდნენ, - განაცხადა საქართველოს პარლამენტის თავმჯდომარის მოადგილემ გიორგი კახიანმა რუსული ნავთობისგან წარმოებული პროდუქტების იმპორტთან დაკავშირებით ბრიტანეთის გადაწყვეტილებაზე საუბრისას.

მისივე თქმით, საქართველოს მიერ მიღებული გადაწყვეტილებები იყო სწორი, რადგან სანქციების გათვალისწინება გამოიწვევდა ქართული ეკონომიკის მოშლას.

„დღეს ჩანს, რომ ჩვენს მიერ მიღებული გადაწყვეტილებები იყო სწორი, რადგან ჩვენ რომ მაშინ ის სანქციები გაგვეთვალისწინებინა, ეს გამოიწვევდა ქართული ეკონომიკის მოშლას“, - აღნიშნა გიორგი კახიანმა.

დიდმა ბრიტანეთმა მიიღო გადაწყვეტილება, რომლის მიხედვითაც 20 მაისიდან დიდ ბრიტანეთში ისევ შესაძლებელი იქნება რუსული ნავთობისგან წარმოებული პროდუქტების იმპორტი.

ბრიტანეთის საელჩოს „ქრონიკამ“ კითხვით მიმართა, რამდენად თანმიმდევრულია ოფიციალური ლონდონის პოლიტიკა. დიდი ბრიტანეთის მთავრობამ სანქცირებულ გადამუშავებულ ნავთობპროდუქტებზე გენერალური სავაჭრო ლიცენზია გასცა. ქვეყანაში იმ აკრძალული საქონლის იმპორტი დაიშვება, რომელიც მესამე ქვეყნებში რუსული ნედლი ნავთობისგან არის დამუშავებული.