გიორგი პატარიძე ხოშტარიას მკურნალ ექიმზე: როდესაც ექიმი აფასებს ასე პაციენტის მდგომარეობას, რომ გააჩნია ისეთი ტკივილები, ფაქტობრივად, წარმოუდგენელი იყო მისი გასინჯვა, მესმის, რომ შეიძლება, დაკავებული ბრძანდება, თუმცა ვფიქრობ, პაციენტის საუკეთესო ინტერესებიდან გამომდინარე, მას უნდა გადაედო ყველაფერი და მომხდარიყო ჩვენთან შეხვედრა

სპეციალური პენიტენციური სამსახურის გენერალური დირექტორი ელენე ხოშტარიას ჯანმრთელობის მდგომარეობასთან დაკავშირებით მკურნალი ექიმის განცხადებას ეხმაურება.

„ძალიან ვწუხვარ, რომ უკვე პრაქტიკულად მესამედ მიწევს კომენტარის გაკეთება ამ საკითხთან დაკავშირებით. თქვენ იცით, რომ წინა ჯერზე, იმ სავალდებულო და მართლაც რომ ძალიან მარტივი დოკუმენტაციის წარმოდგენის შემდეგ, მყისიერად მოხდა ელენე ხოშტარიასთან შესაბამისი დარგის სპეციალისტი ექიმის, ქალბატონი მაკა იოსელიანის დაშვება. ეს განხორციელდა, პრაქტიკულად, 15 წუთის განმავლობაში, როგორც ჩემს მიერ იყო წინასწარ აღნიშნული.

შემდეგ, როდესაც სპეციალისტი, ქალბატონი მაკა იოსელიანი გამოვიდა უკვე მსჯავრდებული ხოშტარიასგან, მან, ცოტა არ იყოს, და გასაკვირიც იყო პირადად ჩემთვის, მოაწყო, ფაქტობრივად, ბრიფინგი, სადაც განაცხადა, რომ პაციენტის, ელენე ხოშტარიას მდგომარეობა არის იმდენად მძიმე და მას აქვს ისეთი ტკივილები, რომ, ფაქტობრივად, წარმოუდგენელია მისი გასინჯვა.

რა თქმა უნდა, პენიტენციური სამსახური და პირადად მე თვალყურს ვადევნებ ამ პროცესს. რა თქმა უნდა, მივიღე გადაწყვეტილება მყისიერად და დავავალე ჩვენი სამედიცინო დეპარტამენტის ხელმძღვანელს, რომ მომხდარიყო კომუნიკაცია ქალბატონ მაკა იოსელიანთან, რათა მასთან მომხდარიყო შეხვედრა. მან დაურეკა, შემდეგ მისწერა მას ეს-ემ-ეს-ითაც, თუმცა რეაგირება იყო საკმაოდ გვიან. დაახლოებით, ორი საათის შემდეგ გაგვცა პასუხი. ჩვენ შევთავაზეთ შეხვედრა გუშინ, დღის ნებისმიერ პერიოდში, თუმცა, სამწუხაროდ და ჩემდა გასაოცრად, პასუხი მივიღე, რომ მას უბრალოდ, ასე ვთქვათ, არ ეცალა და შეძლებდა ჩვენთან შეხვედრას მხოლოდ და მხოლოდ ორშაბათს, დღის მეორე ნახევარში, დაახლოებით, ვციტირებ, დაახლოებით 5 საათზე.

ახლა მე მინდა გკითხოთ თქვენ, მე მინდა ვკითხო საზოგადოებას: თუ ადამიანი განიცდის ისეთ ტკივილს, რომ წარმოუდგენელია მისი გასინჯვა - ეს ექიმის შეფასებაა და ვციტირებ მაკა იოსელიანის სიტყვებს, როდესაც ექიმი აფასებს ასე მდგომარეობას პაციენტისას, რომ მას გააჩნია ისეთი ტკივილები, რომ ფაქტობრივად, წარმოუდგენელი იყო მისი გასინჯვა, მესმის, რომ შეიძლება დაკავებული ქალბატონი ბრძანდება, თუმცა მე ვფიქრობ, პაციენტის საუკეთესო ინტერესებიდან გამომდინარე, მას უნდა გადაედო ყველაფერი და ეს უნდა ყოფილიყო მისთვის უმნიშვნელოვანესი, რომ მომხდარიყო ჩვენთან შეხვედრა; გაგვეცვალა, აზრები, დაგვეგეგმა, გაგვეწერა შემდგომი მკურნალობის ტაქტიკა და დაგვეგეგმა სამომავლო გეგმები მსჯავრდადებულთან მიმართებაში. კიდევ ერთხელ აღვნიშნავ, გულწრფელად ვამბობ, პირადად ჩემთვის ეს იყო მართლაც უბრალოდ გაუგებარი“, - განაცხადა გიორგი პატარიძემ.