გიორგი სოსიაშვილი ევრობიუროკრატებზე: მათი მთავარი მიზანია თავისუფალი სიტყვის ჩახშობა, დევნა, რომ ადამიანებმა არ გაიგონ სიმართლე, რომ თავიანთი ნარატივი, დღის წესრიგი მოახვიონ თავზე ყველას და როგორც მათ სურთ, ისეთი განწყობა არსებობდეს საზოგადოებაში

მათი მთავარი მიზანია თავისუფალი სიტყვის ჩახშობა, თავისუფალი სიტყვის დევნა, რომ ადამიანებმა არ გაიგონ სიმართლე, რომ თავიანთი ნარატივი, თავიანთი დღის წესრიგი მოახვიონ თავზე ყველას და როგორც მათ სურთ, ისეთი განწყობა არსებობდეს საზოგადოებაში, - განაცხადა განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, საპარლამენტო უმრავლესობის წევრმა გიორგი სოსიაშვილმა ევროპარლამენტარ კშიშტოფ ბრეიზას განცხადების შეფასებისას, რომელმაც თანამოაზრეებთან ერთად, საქართველოს ყველა რეიტინგული ტელევიზიის შესწავლა მოითხოვა.

მან „იმედში“ სპეცრაზმელების შეჭრის ფაქტი გაიხსენა და აღნიშნა, რომ დასავლეთს აღნიშნულის გამო არასოდეს ხმა არ ამოუღია.

„ჩვენ ძალიან კარგად გვახსოვს, თუ როგორ შევარდნენ „იმედის“ შენობაში ნიღბიანი სპეცრაზმელები, დაარბიეს და არასოდეს ხმა არ ამოუღიათ ამ ადამიანებს, მაგრამ ახლა, როდესაც დაინახეს, რომ ქართველ ხალხს ტელეკომპანია „იმედი“, „პოს ტვ“, „რუსთავი 2“ სიმართლეს აწვდიან და საზოგადოებაში ძალიან კარგად აეხილათ თვალი იმ რეალობაზე, რაც ხდებოდა საქართველოს თავს, ბუნებრივია, ეს მათთვის მიუღებელია და დაიწყეს დაჟინებით, ამ ტელევიზიების წინააღმდეგ დასანქცირება და მთელი რიგი ღონისძიებები. რაც ყველაზე მთავარია, ქართველი აგენტები ეხმარებიან მათ“, - აღნიშნა სოსიაშვილმა.

ევროპარლამენტარმა კშიშტოფ ბრეიზამ თანამოაზრეებთან ერთად, საქართველოს ყველა რეიტინგული ტელევიზიის შესწავლა მოითხოვა. მისი განცხადებით, ევროპარლამენტში „იმედის“ საქმიანობის აკრძალვა, სწორედ მისი და გუნდის აღმოსავლური პოლიტიკის კოორდინატორის, ელენე მეტრეველის ერთობლივი ინიციატივის დამსახურებაა.